மீண்டும் தனுஷ் ஜோடியாக தமன்னா
தனுஷ் ஏற்கனவே ஜகமே தந்திரம், கர்ணன் மற்றும் இந்தியில் அந்த்ரங்கி ரே ஆகிய படங்களில் நடித்து முடித்துள்ளார்.
தற்போது கார்த்திக் நரேன் இயக்கும் படத்தில் நடிக்கிறார். இது தனுசுக்கு 43-வது படம். படப்பிடிப்பு தொடங்கி உள்ளது. இதில் தனுஷ் ஜோடியாக மாளவிகா மோகனன் நடிக்கிறார். சமுத்திரக்கனியும் முக்கிய கதாபாத்திரத்தில் வருகிறார். இந்த படத்தை முடித்து விட்டு செல்வராகவன் இயக்கும் படத்தில் நடிக்க உள்ளார். இந்த படத்துக்கு நானே வருவேன் என்று பெயர் வைத்துள்ளனர். திகில் கதையம்சம் உள்ள அதிரடி படமாக தயாராகிறது.
ஏற்கனவே செல்வராகவன் இயக்கிய காதல் கொண்டேன், புதுப்பேட்டை, மயக்கம் என்ன ஆகிய படங்களில் தனுஷ் நடித்துள்ளார். நானே வருவேன் படத்தில் தனுஷ் ஜோடியாக நடிக்க தமன்னாவிடம் பேசி இருப்பதாகவும், அவர் ஒப்புதல் அளித்து விட்டதாகவும் தகவல் வெளியாகி உள்ளது. ஏற்கனவே படிக்காதவன், வேங்கை படங்களில் தனுசும், தமன்னாவும் ஜோடியாக நடித்துள்ளனர்.