டாஸ்மாக் பாரில் இருந்த கண்காணிப்பு கேமரா 'ஹார்டு டிஸ்க்' பறிமுதல்

தஞ்சையில் டாஸ்மாக் பாரில் மது குடித்து இருவர் இறந்த விவகாரத்தில், 10 நாட்கள் ஆகியும் துப்பு கிடைக்காமல் போலீசார் திணறி வருகிறார்கள். இந்த நிலையில் பாரில் இருந்த கண்காணிப்பு கேமரா ஹார்டு டிஸ்க்கை போலீசார் பறிமுதல் செய்தனர்.

டாஸ்மாக் பார்

தஞ்சை கீழ அலங்கத்தில் தற்காலிக மீன்மார்க்கெட் உள்ளது.இந்த மீன்மார்க்கெட்டுக்கு எதிரில் உள்ள டாஸ்மாக் பாரில், கடந்த 21-ந் தேதி, காலை 11:00 மணிக்கு, மீன்வியாபாரி குப்புசாமி (வயது 68), கார் டிரைவர் குட்டி விவேக் (36) ஆகியோர் மது குடித்து மயங்கி விழுந்து இறந்தனர். அவர்கள் குடித்த மதுவில் சயனைடு கலந்திருந்ததும் பிரேத பரிசோதனையில் தெரிய வந்தது. இந்த சம்பவம் தொடர்பாக தஞ்சை நகர கிழக்கு போலீசார் வழக்குப்பதிவு செய்தனர். மேலும், 2 கூடுதல் போலீஸ் சூப்பிரண்டுகள் மேற்பார்வையில் 5 துணை போலீஸ் சூப்பிரண்டுகள் தலைமையில் தனிப்படை அமைக்கப்பட்டு விசாரணை நடந்து வருகிறது. இதற்கிடையில், இறந்த குப்புசாமியின் மனைவி காஞ்சனா தேவி, தனது கணவர் இறப்பு குறித்து சி.பி.சி.ஐ.டி., விசாரணை நடத்த வேண்டும் என கடந்த சில நாட்களுக்கு முன்பு போலீஸ் சூப்பிரண்டு அலுவலகத்தில் மனு அளித்தார்.

துப்பு கிடைக்காமல் திணறல்

இருப்பினும், இந்த சம்பவம் நடந்து 10 நாட்களுக்கு மேலாகியும் இதில் இருவரும் குடித்த மதுவில் சயனைடு எப்படி கலக்கப்பட்டது? என இதுவரை போலீசாருக்கு துப்பு கிடைக்காமல், விசாரணையில் திணறி வருகின்றனர்.

மேலும் டாஸ்மாக் பாரில் உள்ள சி.சி.டி.வி., கண்காணிப்பு கேமரா கடந்த 3 மாதங்களாக பழுதாகி உள்ளதாக கூறப்பட்டு வந்தது. இருப்பினும், போலீசாருக்கு சந்தேகம் இருந்த வந்த நிலையில், நேற்று தஞ்சை மேற்கு போலீஸ் இன்ஸ்பெக்டர் சந்திரா, சிறப்பு தனிப்படை இன்ஸ்பெக்டர் சோமசுந்தரம், கலால் தாசில்தார் தங்க பிரபாகரன் ஆகியோர் டாஸ்மாக் பாருக்கு வந்தனர்.

ஹார்டு டிஸ்க் பறிமுதல்

அவர்கள் பாரின் முன்பக்க பூட்டை திறந்து பாரில் உள்ள சி.சி.டி.வி., கண்காணிப்பு கேமராவின் ஹார்டு டிஸ்க்கை பறிமுதல் செய்து ஆய்வு செய்வதற்காக எடுத்துச்சென்றனர். இதனால் அந்த பகுதி பரபரப்பாக காணப்பட்டது.