மகளிர் பிக்பாஷ் 20 ஓவர் கிரிக்கெட் :ஸ்மிரிதி மந்தனா அதிரடியால் சிட்னி தண்டர்ஸ் வெற்றி

ஆஸ்திரேலியா 

மகளிர் பிக்பாஷ் 20 ஓவர் கிரிக்கெட் தொடரில் இன்று காலை நடைபெற்ற 46 வது லீக் ஆட்டத்தில் சிட்னி சிக்சர்ஸ் அணியை 6 விக்கெட் வித்தியாசத்தில் வீழ்த்தி சிட்னி தண்டர்ஸ்  அணி வெற்றி பெற்றது.

ஆஸ்திரேலியாவின் மிக பிரபலமான 20 ஓவர் தொடர் பிக்பாஷ் லீக். இந்த ஆண்டுக்கான மகளிர் பிக்பாஷ் லீக் கடந்த மாதம் தொடங்கி நடைபெற்று வருகிறது. இதில் மெல்போர்ன் ரெனேகட்ஸ், மெல்போர்ன் ஸ்டார்ஸ் ,பிரிஸ்மென் ஹீட்,கோபர்ட் ஹூரிகேன்ஸ், பெர்த் ஸ்கார்சேர்ஸ் ,சிட்னி தண்டர்ஸ் , அடிலெய்டு ஸ்ட்ரைக்கர்ஸ், சிட்னி சிக்சர்ஸ் என மொத்தம் 8 அணிகள் பங்கேற்றுள்ளன.

இன்று காலை நடைபெற்ற போட்டியில் முதலில் பேட் செய்த சிட்னி சிக்சர்ஸ் அணி 20 ஓவர்கள் முடிவில் 6 விக்கெட்களை இழந்து 94 ரன்கள் குவித்தது.அந்த அணியின் தரப்பில் எல்லிஸ் பெர்ரி 40 பந்துகளில் 40 ரன்கள் குவித்தார்.95 ரன்கள் எடுத்தால் வெற்றி என்ற இலக்குடன் களமிறங்கியது சிட்னி தண்டர்ஸ் அணி.

 சிட்னி தண்டர்ஸ்  அணியின் தொடக்க வீராங்கனையாக களமிறங்கிய நட்சத்திர இந்திய வீராங்கனை ஸ்மிரிதி மந்தனா 39 பந்துகளில் 45 ரன்கள் அடித்து அணியின் வெற்றிக்கு வழிவகுத்தார். 4 ஓவர்கள் வீசி 27 ரன்கள் மட்டுமே கொடுத்து 2 விக்கெட்கள் கைப்பற்றிய  சிட்னி தண்டர்ஸ்  அணியின் இசி வோங் ஆட்டநாயகி விருது  பெற்றார்.