திருச்சி அருகே, மாமன் மகளான 6 வயது சிறுமிக்கு பாலியல் தொல்லை போக்சோ சட்டத்தில் 2 மாணவர்கள் கைது

ஜீயபுரம்,

திருச்சி மாவட்டம் ஜீயபுரம் அருகே உள்ள தாயனூர் கீழக்காடு பகுதியை சேர்ந்த ஒரு தம்பதியின் 6 வயது மகள், அப்பகுதியில் உள்ள பள்ளி ஒன்றில் 2-ம் வகுப்பு படித்து வருகிறாள். அச்சிறுமியினுடைய தந்தையின் சகோதரிகளில் ஒருவர் ஏழுவாய்க்கால் கரையிலும், இன்னொருவர் அளுந்தூரிலும் வசித்து வருகிறார்கள்.

தற்போது பள்ளிகளுக்கு கோடை விடுமுறை விடப்பட்டுள்ளது. அத்தைகளின் மகன்களான 10-ம் வகுப்பு முடித்து 11-ம் வகுப்பு செல்லக்கூடிய 16 வயதுடைய மாணவரும், 5-ம் வகுப்பு முடித்து 6-ம் வகுப்பு செல்லக்கூடிய 11 வயதுடைய மாணவரும் கீழக்காட்டில் உள்ள சிறுமியின் வீட்டிற்கு கோடை விடுமுறையை கழிப்பதற்காக வந்தனர்.

சிறுமிக்கு பாலியல் தொல்லை

கடந்த சில நாட்களுக்கு முன்பு, விடுமுறைக்காக வந்த சிறுவர்களிடம் மகளை பத்திரமாக பார்த்து கொள்ளுங்கள் எனக்கூறி விட்டு சிறுமியின் பெற்றோர் வேலைக்காக வெளியில் சென்று விட்டனர். அப்போது வீட்டில் தனியாக இருந்த சிறுமியும் மற்றும் 2 மாணவர்களும் சேர்ந்து ஓடிவிளையாடி இருக்கிறார்கள். ஒரு கட்டத்தில், அச்சிறுமியை 2 பேரும் சேர்ந்து பாலியல் ரீதியாக துன்புறுத்தியதாக கூறப்படுகிறது.

2 நாட்கள் கடந்தும், சிறுமி வீட்டில் பெற்றோரிடம் அதை தெரிவிக்கவில்லை. இந்த நிலையில் நேற்று முன்தினம் சிறுமிக்கு, அதிக அளவில் உதிரப்போக்கு ஏற்பட்டது. அதைக்கண்டு சிறுமியின் தாயார் அதிர்ச்சி அடைந்தார். சிறுமியிடம் விசாரித்தபோது, அத்தை மகன்கள் 2 பேரும் தன்னிடம் நடந்து கொண்ட விதத்தை தெரிவித்து அழத்தொடங்கினாள். உடனடியாக சிறுமியை, திருச்சி அரசு ஆஸ்பத்திரியில் சிகிச்சைக்காக பெற்றோர் சேர்த்தனர்.

போக்சோ சட்டத்தில் கைது

இதுகுறித்து ஜீயபுரம் அனைத்து மகளிர் போலீசில் சிறுமியின் பெற்றோர் புகார் செய்தனர். அதன்பேரில், இன்ஸ்பெக்டர் விஜயலட்சுமி வழக்குப்பதிவு செய்து, பள்ளி மாணவர்கள் 2 பேரையும் போக்சோ சட்டத்தின்கீழ் நேற்று கைது செய்தார். கைதான 2 பேரும் சிறுவர்கள் என்பதால், அவர்கள் சிறுவர் சீர்திருத்தப்பள்ளிக்கு அனுப்பி வைக்கப்பட்டனர்.

பாதிக்கப்பட்ட சிறுமிக்கு, தொடர்ந்து திருச்சி அரசு ஆஸ்பத்திரியில் சிகிச்சை அளிக்கப்பட்டு வருகிறது.