உறவினருக்கு பெண் பார்க்க சென்றபோது பரிதாபம்: மோட்டார் சைக்கிள் மீது வேன் மோதல்; தி.மு.க. நிர்வாகி பலி

பாகூர்,

கடலூர் மாவட்டம் நல்லாத்தூர் பகுதியை சேர்ந்தவர் அழகப்பன். அதே பகுதியை சேர்ந்தவர் சுப்புராம் (வயது 62). கடலூர் மாவட்ட தி.மு.க. வடக்கு ஒன்றிய செயலாளர்.

இவர்கள் 2 பேரும் நேற்று காலை உறவினர் ஒருவருக்கு பெண் பார்க்க நல்லாத்தூரில் இருந்து மடுகரைக்கு இருசக்கர வாகனத்தில் சென்றனர். அழகப்பன் வண்டியை ஓட்டினார். சுப்புராம் பின்னால் அமர்ந்திருந்தார்.

வேன் மோதல்

புதுவை மாநிலம் கல்மண்டபம் அருகே சென்ற போது எதிரே வந்த வேன் திடீரென்று மோட்டார் சைக்கிள் மீது மோதியது. இதில் தூக்கி வீசப்பட்ட சுப்புராம் படுகாயம் அடைந்தார். அழகப்பன் லேசான காயம் அடைந்தார்.

உடனே அருகில் இருந்தவர்கள் அவர்களை மீட்டு சிகிச்சைக்காக நெட்டப்பாக்கம் அரசு மருத்துவமனைக்கு அனுப்பி வைத்தனர். பின்னர் மேல்சிகிச்சைக்காக சுப்புராம் மதகடிப்பட்டு தனியார் மருத்துவக்கல்லூரி மருத்துவமனைக்கு கொண்டு செல்லப்பட்டார். அங்கு அவரை பரிசோதித்த டாக்டர்கள், சுப்புராம் ஏற்கனவே இறந்து விட்டதாக தெரிவித்தனர்.

இது குறித்து கிருமாம்பாக்கம் போக்குவரத்து போலீசார் வழக்குப்பதிவு செய்து விசாரணை நடத்தி வருகின்றனர்.