உலக நாடுகளில் பட்டைய கிளப்பும் பலே...! டிரங்கு பெட்டிகள்

அட, டிரங்கு பெட்டிகளின் அருமையை நாம்தான் உணரவில்லை போல, அந்தளவிற்கு உலக நாடுகளில் சொகுசான, மவுசான மிகவும் விலை உயர்ந்த டிரங்கு பெட்டிகள் தயாரிக்கப்படுகின்றன. அதை செல்வந்தர்களும் வாங்கி பயன்படுத்துகிறார்கள். பல்வேறு வசதிகளைக் கொண்ட வசீகரிக்கும் சொகுசு டிரங்கு பெட்டிகளை நாம் வாங்காவிட்டாலும், அதுபற்றி படித்து பார்த்து ரசிக்கலாமே...!

* மைக்கேல் கிளார்க்கின் டிரங்கு பெட்டி

ஆஸ்திரேலிய கிரிக்கெட் அணியின் முன்னாள் கேப்டன் மைக்கேல் கிளார்க், புகழ்பெற்ற லூயிஸ் உய்ட்டன் வடிவமைப்பு நிறுவனத்துடன் இணைந்து உருவாக்கிய பிரபலமான டிரங்கு பெட்டிதான் இது. இதனை வடிவமைக்கும்போது எப்படி பெட்டி அமைய வேண்டும் என பல்வேறு யோசனைகளை கிளார்க் வழங்கினார்.

140 செ.மீட்டர் உயர டிரங்கு பெட்டி இது. மென்மையான கிராபைட் கேன்வாஸ் கேஸால் உருவான இதில் கிரிக்கெட் உபகரணங்கள், ஷூக்கள், மேலாடைகள் என பலவற்றையும் இஷ்டம் போல வைக்கலாம். களைப்பானால் பாடல் கேட்க சவுண்ட் சிஸ்டம் வசதியும் உண்டு. இது விளையாட்டு வீரர்களுக்காகவே பிரத்யேகமாக தயாரிக்கப்பட்டது! இதன் விலை 1 லட்சத்து 70 ஆயிரம் டாலர்கள்.

* குக்சி அழகு டிரங்கு பெட்டி

இத்தாலியில், கையினாலேயே இழைத்து உருவாக்கப்பட்ட குக்சி நிறுவன சொகுசுப் பெட்டி இது. கருப்பு தோல் கவர் போர்த்திய 13 டிராயர்கள் கொண்டது. உள்ளே மர டிராயர், நகைகள் வைக்க லினன் துணி டிராயர் எல்லாம் உண்டு. பாதுகாக்க பூட்டு வசதிகளும் கொண்ட இதன் விலை 49 ஆயிரத்து 300 டாலர். அசர வைக்கும் அழகுப்பெட்டி இது.

* லூயிஸ் உய்ட்டன் கிளாசிக் டிரங்கு பெட்டிகள்

இது 19-ம் நூற்றாண்டிலிருந்து பல்வேறு பணக்கார மனிதர்களுக்கு சொகுசுப் பெட்டிகள் தயாரித்து வரும் லூயிஸ் உய்ட்டன் நிறுவனத்தினரால் 1854-ம் ஆண்டு முதல் உருவாக்கப்படும் தோல் சுமைதாங்கி சொகுசுப் பெட்டி. இதனுள் துணி அலமாரி, தற்காப்புக் கவசம், 4 சூட்கேஸ்கள், படகில் பயன்படும் டிரங்கு பெட்டிகள், நகைப்பெட்டி, சொகுசுப் பை மற்றும் ஹேட் கவர் ஆகியவை இருக்கும். ஹாலிவுட் நடிகைகளான பாரிஸ் ஹில்டன், கிம் கர்தாஷியன் உள்ளிட்டவர்கள் போற்றிப் பாதுகாக்கும் பெட்டிகள் இவைதான். விலை 60 ஆயிரம் டாலர்!

* முதலைத்தோல் டிரங்கு பெட்டிகள்

2010-ம் ஆண்டு பொட்டிகா வெனெட்டா நிறுவனத்தால் வசந்த கால கலெக்ஷனாக அறிமுகப்படுத்தப்பட்ட பெட்டிகள் இவை. 6 தனித்தனி சுமை தாங்கி செட்டுகளை தன்னகத்தே கொண்டது! முதலையின் மேல் தோலில்இருந்து உருவாக்கப்பட்ட இதனுள் ஒரு சிறு சூட் கேஸ், ஒரு நடுத்தர சூட்கேஸ், ஒரு பெரிய சூட்கேஸ், துணிகள் எடுத்துச் செல்ல அழகிய கைப்பெட்டி உள்பட 6 பெட்டிகள் உள்ளன. இவற்றை தனித்தனியாகவும் வாங்கலாம். வலுப்படுத்தப்பட்ட முனைகளையும், பாதுகாப்பான பூட்டு வசதிகளையும் கொண்ட மிக மென்மையான முதலைத்தோலில் உருவான சூப்பர் டிரங்கு பெட்டிகளுக்கு 1 லட்சத்து 57 ஆயிரம் டாலர்களை விலையாக நிர்ணயித்திருக்கிறார்கள்.

* பயணிகளுக்கான டிரங்கு பெட்டி

இங்கிலாந்தைச் சேர்ந்த சொகுசுப்பொருட்கள் தயாரிப்பு நிறுவனமான ஷிவாஸ் ரீகல் மற்றும் குளோப் டிராட்டர் இணைந்து 'மேட் பார் ஜென்டில்மேன்' என்ற பெயரில் தயாரித்த லிமிடெட் எடிஷன் சொகுசு டிரங்கு பெட்டி இது. வெள்ளை 'ஓக்' மரத்தில் செய்யப்பட்ட இந்த 20 அங்குல உயரப் பெட்டியின் பாரம்பரிய வடிவமைப்பு, நேர்த்தியான வசதி மற்றும் தரத்திற்கு பஞ்சமில்லை. அடியில் டிராலியும் இருப்பதால் எளிதில் இழுத்துச் சென்று விமானமோ, கப்பலோ உள்ளே பாதுகாப்பாக வைத்துவிட்டு பயணத்தை ரசிக்கலாம். இதனுள் மது, உணவு, துணிகள், கடிகாரங்கள், ஷூக்கள் வைப்பதற்கான கச்சிதமான இடம் உண்டு. தங்கும் இடத்தில் ஒரு அலமாரி போல நிறுத்தி வைக்கலாம். விலை அதிகமில்லை, 18 ஆயிரத்து 800 டாலர் மட்டுமே...!