அரசு பஸ்களில் திருநங்கைகளும் இலவச பயணம் குறித்து விரைவில் முடிவு மு.க.ஸ்டாலின் டுவிட்டர் பதிவு

சென்னை, 

சாதாரண கட்டண நகர பஸ்களில் பயணம் செய்யும் பெண்கள் கட்டணமில்லாமலும், பயண அட்டை இல்லாமலும் பயணம் செய்யலாம் என்று முதல்-அமைச்சர் மு.க.ஸ்டாலின், நேற்று முன்தினம் ஆணை பிறப்பித்தார்.

இந்நிலையில், ஊடகவியலாளர் இந்துஜா ரகுநாதன், “பெண்களுடன் திருநங்கைகளுக்கும் இலவச பஸ் பயணத் திட்டத்தை அறிவித்தால் நன்றாக இருக்கும்” என்று தனது டுவிட்டர் பக்கத்தின் வாயிலாக முதல்-அமைச்சர் மு.க.ஸ்டாலினுக்கு கோரிக்கை வைத்திருந்தார்.

இதனையடுத்து, முதல்-அமைச்சர் மு.க.ஸ்டாலின், நேற்று தனது டுவிட்டர் பக்கத்தில், “மகளிர் நலன் - உரிமை ஆகியவற்றுடன் திருநங்கையர் வாழ்வையும் இணைத்தே சிந்திப்பது தலைவர் கருணாநிதி காலந்தொட்டே தி.மு.க. அரசின் வழக்கம். தாங்கள் அதனை கவனப்படுத்தியமைக்கு நன்றி. பெண்களைப் போலவே திருநங்கையரும் கட்டணமின்றிப் பயணிப்பது குறித்து பரிசீலித்து, உரிய முடிவு விரைந்து எடுக்கப்படும்” என்று கூறியுள்ளார்.