6 விக்கெட்டுகள் வீழ்த்தி முஸ்தபிசுர் ரஹ்மான் அசத்தல்: அமெரிக்கா அணியை வீழ்த்திய வங்காளதேசம்

ஹூஸ்டன்,

வங்காளதேச கிரிக்கெட் அணி அமெரிக்காவில் சுற்றுப்பயணம் மேற்கொண்டு அந்நாட்டு அணிக்கெதிராக 3 போட்டிகள் கொண்ட டி20 தொடரில் விளையாடி வருகிறது. இதில் நடைபெற்ற முதல் 2 போட்டிகளின் முடிவிலேயே அமெரிக்கா 2-0 என்ற கணக்கில் தொடரை கைப்பற்றி வங்காளதேசத்துக்கு அதிர்ச்சி அளித்தது. இதனையடுத்து இவ்விரு அணிகளுக்கு இடையிலான 3-வது மற்றும் கடைசி போட்டி இன்று நடைபெற்றது.

அதில் டாஸ் வென்ற வங்காள தேச அணி பந்து வீச்சைத் தேர்வு செய்தது. இதன்படி முதலில் பேட்டிங் செய்த அமெரிக்கா அணி நிர்ணயிக்கப்பட்ட 20 ஓவர்களில் 9 விக்கெட்டுளை இழந்து 104 ரன்கள் மட்டுமே எடுத்தது. அந்த அணியின் சார்பில் அதிகபட்சமாக ஆண்ரிஸ் கோஸ் 27 ரன்கள் எடுத்தார். வங்காளதேச அணியின் சார்பில் சிறப்பான பந்துவீச்சை வெளிப்படுத்திய முஸ்தபிசுர் ரஹ்மான் 6 விக்கெட்டுகளை விழ்த்தி அசத்தினார்.

இதனையடுத்து 105 ரன்கள் எடுத்தால் வெற்றி என்ற எளிய இலக்குடன் வங்காள தேச அணியின் சார்பில் டான்சிட் ஹசன் மற்றும் சவுமியா சர்கார் ஆகியோர் களமிறங்கினர். சிறப்பான ஆட்டத்தை வெளிப்படுத்திய இந்த ஜோடி ஆட்டத்தை வெற்றிப்பாதைக்கு அழைத்துச் சென்றது. இறுதியில் அதிரடியான ஆட்டத்தை வெளிப்படுத்திய டான்சிட் ஹசன் 58 (42) ரன்களும், சவுமியா சர்கார் 43 (28) ரன்களும் எடுத்து கடைசிவரை ஆட்டமிழக்காமல் களத்தில் இருந்தனர்.

இதன்மூலம் அமெரிக்கா அணிக்கு எதிரான போட்டியில் 10 விக்கெட்டுகள் வித்தியாசத்தில் வங்காளதேச அணி அபார வெற்றிபெற்றது. ஏற்கனவே அமெரிக்கா அணி தொடரை கைப்பற்றிவிட்டநிலையில், வங்காளதேச அணிக்கு இது ஆறுதல் வெற்றியாக அமைந்தது.