என்னைவிட சிறந்த 4 நடிகர்களையாவது உங்களுக்கு அடையாளம் காட்டிவிட்டுத்தான் செல்வேன் - கமல்
கமல் - மணிரத்னம் கூட்டணியில் உருவாகியுள்ள 'தக் லைப்' படம் வருகிற ஜூன் 5-ம் தேதி திரைக்கு வருகிறது.;
சென்னை,
36 வருடங்களுக்குப் பிறகு கமல்ஹாசன் - மணிரத்னம் கூட்டணியில் உருவாகியுள்ள படம் 'தக் லைப்'. இப்படத்தில் நடிகர் சிம்பு, திரிஷா, ஜோஜு ஜார்ஜ், ஐஸ்வர்யா லட்சுமி, கவுதம் கார்த்திக் மற்றும் பாலிவுட் நடிகர் அலி பசல் உள்ளிட்டோர் முக்கிய கதாபாத்திரங்களில் நடித்துள்ளனர். இசைப்புயல் ஏ.ஆர்.ரகுமான் இசையமைத்திருக்கும் இப்படத்தை ராஜ்கமல் பிலிம்ஸ் இன்டர்நேஷனல், மெட்ராஸ் டாக்கீஸ், ரெட் ஜெயன்ட் மூவிஸ் இணைந்து தயாரித்துள்ளது. இப்படம் வருகிற ஜூன் 5-ம் தேதி திரைக்கு வருகிறது.
படத்தின் ரிலீஸ் தேதி நெறுங்கி வருவதால் படத்திற்கான புரோமோஷன் பணிகள் தீவிரமாக நடைபெற்று வருகிறது. இப்படத்தின் இசை வெளியீட்டு விழா சமீபத்தில் நடைபெற்றது.
'தக் லைப்' படத்தின் முதல் பாடலான 'ஜிங்குச்சா' வெளியாகி மக்களிடையே பெறும் வரவேற்பை பெற்று வருகிறது. இத்திரைப்படத்தின் 'ஜிங்குச்சா' பாடல் யூடியூபில் 4 கோடி பார்வைகளை கடந்துள்ளது. இப்பாடலை கமல்ஹாசன் வரிகளில் ஆதித்யா, வைஷாலி சமந்த், சக்தி ஸ்ரீ கோபாலன் இணைந்து பாடியுள்ளனர். இந்த படத்தின் 2வது பாடலான 'சுகர் பேபி' வெளியாகி மக்களிடையே பெறும் வரவேற்பை பெற்று வருகிறது.
இந்த நிலையில், கேரளாவில் நடைபெற்ற 'தக் லைப்' பட பிரமோஷன் நிகழ்ச்சியில் "சாதனை படைத்துவிட்டால் கீழே இறங்கித்தான் ஆகவேண்டும், நான் இறங்கத் தயார். ஆனால், எனக்கு அடுத்த தலைமுறையில் என்னை விட சிறந்த 4 நடிகர்களையாவது உங்களுக்கு அடையாளம் காட்டிவிட்டுத்தான் நான் செல்வேன். இது எனது குருமார்களுக்கு நான் கொடுக்கும் தட்சணை " என கூறியுள்ளார்