பாமக அலுவலக முகவரியை மாற்றிய அன்புமணி ராமதாஸ்

சென்னை,

பாமக நிறுவனர் ராமதாஸ், அன்புமணியை மத்திய அமைச்சராக்கியது தவறு என்றும் பொதுக்குழுவை கூட்டி அவரை நீக்குவேன் என்பன உள்ளிட்ட பல குற்றச்சாட்டுகளை அடுக்கடுக்காக வைத்தார். தைலாபுரத்தில் ராமதாஸ் அளித்த பேட்டி பாமகவினர் மத்தியில் அதிர்வலைகளை ஏற்படுத்தியது. உட்கட்சி மோதலில் அடுத்து என்ன நடக்கும் என்று கேள்விகள் எழுந்திருக்கும் சூழலில், கட்சியின் மாவட்ட தலைவர்கள், மாவட்ட செயலாளர்களை உள்ளிட்டோரை இன்று சந்தித்து அன்புமணி ஆலோசனை நடத்தினார்.

அப்போது பேசிய அவர், கட்சியில் என்றும் அடிமட்ட தொண்டராக இருக்கவே விரும்புகிறேன் என்றும், பாமக என்பது யாருடைய தனிச்சொத்தும் இல்லை,தொண்டர்களாகிய நீங்கள் தான் பாட்டாளி மக்கள் கட்சி என்றார். மேலும், எனக்கு நேற்றுதான் விடுதலை கிடைத்தது எனவும், இனி எந்த தடைகள் வந்தாலும், உடைத்தெறிந்து முன்னேறுவோம் என்றும் பேசினார்.

இந்த நிலையில், பாமக அலுவலக முகவரியை அன்புமணி ராமதாஸ் மாற்றியுள்ளார். அன்புமணி வெளியிட்ட புதிய உறுப்பினர் சேர்க்கை படிவத்தில் பாமக அலுவலகத்தின் முகவரி மாற்றப்பட்டுள்ளது. சென்னை, தி.நகர் தெருவில் உள்ள தனது வீட்டின் முகவரியை கட்சி அலுவலக முகவரியாக அன்புமணி ராமதாஸ் மாற்றியுள்ளார்.