கடைசி டெஸ்ட் : 3வது நாள் முடிவில் இங்கிலாந்து 50/1

லண்டன்,

இந்தியா - இங்கிலாந்து அணிகள் மோதும் 5-வது மற்றும் கடைசி டெஸ்ட் போட்டி லண்டன் ஓவல் மைதானத்தில் நடைபெற்று வருகிறது. இந்திய அணி முதல் இன்னிங்ஸில் 224 ரன்களில் சுருண்டது. கருண் நாயர் அதிகபட்சமாக 57 ரன்கள் எடுத்தார். அட்கின்சன் 5 விக்கெட்டுகளும், ஜோஷ் டங் 3 விக்கெட்டுகளும் கைப்பற்றினர். இங்கிலாந்து முதல் இன்னிங்ஸில் 247 ரன்கள் எடுத்தது. இது இந்தியாவின் முதல் இன்னிங்ஸ் ஸ்கோரை விட 23 ரன்கள் கூடுதலாகும். கிராவ்லி 64 ரன்களும், ஹாரி புரூக் 53 ரன்களும் எடுத்தனர்.

முகமது சிராஜ், பிரஷித் கிருஷ்ணா தலா 4 விக்கெட்டுகளும், ஆகாஷ் தீப் 1 விக்கெட்டும் வீழ்த்தினர்.23 ரன்கள் பின்தங்கிய நிலையில் இரண்டாவது இன்னிங்ஸை விளையாடிய இந்தியா, நேற்றைய இரண்டாவது நாள் ஆட்ட நேர முடிவில் 2 விக்கெட் இழப்புக்கு 75 ரன்கள் எடுத்திருந்தது. ஜெய்ஸ்வால் 51 ரன்களும், ஆகாஷ் தீப் 4 ரன்களும் எடுத்து ஆட்டமிழக்காமல் இருந்தனர். கே.எல். ராகுல் 7 ரன்களிலும், சாய் சுதர்சன் 11 ரன்களிலும் பெவிலியன் திரும்பினர்.

இன்று மூன்றாவது நாள் ஆட்டம் தொடங்கியதும், விரைவாக விக்கெட்டுகளை வீழ்த்தலாம் என்ற இங்கிலாந்து அணியின் திட்டத்திற்கு ஆகாஷ் தீப் , ஜெய்ஸ்வால் முட்டுக்கட்டைபோட்டனர். ஆகாஷ் தீப் சிறப்பாக விளையாடி அரைசதமடித்தார் . அவர் 66 ரன்களில் ஆட்டமிழந்தார். சிறப்பான ஆட்டத்தை வெளிப்படுத்திய ஜெய்ஸ்வால் சதம் விளாசினார்.

தொடர்ந்து விளையாடிய ஜெய்ஸ்வால் 118 ரன்களில் ஆட்டமிழந்தார் . பின்னர் வந்த துருவ் ஜுரேல் 34 ரன்களில் வெளியேறினார்.

தொடர்ந்து ஜடேஜா , . வாஷிங்டன் சுந்தர் இருவரும் இணைந்து சிறப்பாக விளையாடினர் நிலைத்து ஆடிய ஜடேஜா அரைசதமடித்து அசத்தினார் . மறுபுறம் வாஷிங்டன் சுந்தர் அதிரடியாக விளையாடினார் . பந்துகளை பவுண்டரி , சிக்சருக்கு பறக்க விட்ட அவர் அரைசதமடித்தார்.

பின்னர் ஜடேஜா 53 ரன்களிலும் , வாஷிங்டன் சுந்தர் 53 ரன்களிலும் ஆட்டமிழந்தனர் . இறுதியில் இந்திய அணி 2வது இன்னிங்சில் 396 ரன்களுக்கு ஆட்டமிழந்தது.

இதனால் இங்கிலாந்து அணிக்கு 374 ரன்கள் இலக்கு நிர்ணயிக்கப்பட்டது. இங்கிலாந்து சார்பில் கஸ் அட்கின்சன் 5 விக்கெட்டுகள் வீழ்த்தினார் .

தொடர்ந்து  374ரன்கள் இலக்குடன் இங்கிலாந்து அணி 2வது இன்னிங்சில் விளையாடியது தொடக்கம் முதல் பென் டக்கெட் , ஜாக் கிராலி இருவரும் இணைந்து சிறப்பாக விளையாடினர் . தொடக்க விக்கெட்டுக்கு 50 ரன்கள் சேர்த்த நிலையில் ஜாக் கிராலி 14 ன்களுக்கு முகமது சிராஜ் பந்துவீச்சில் ஆட்டமிழந்தார்.

இறுதியில் 3வது நாள் முடிவில் இங்கிலாந்து அணி ஒரு விக்கெட் இழப்பிற்கு 50 ரன்கள் எடுத்தது . இங்கிலாந்து அணியின் வெற்றிக்கு இன்னும் 324 ரன்கள் தேவைப்படுகிறது .