கோவை ஏல மையத்தில் இலை ரக தேயிலை விலை உயர்வு

கோவை,

கோவை ஏல மையத்தில், இலை ரக தேயிலை விலை அதிகரித்தது.

கோவை- மேட்டுப்பாளையம் சாலையில் உள்ள கோவை தேயிலை வர்த்தக மையத்தில் வாரந்தோறும் மின்னணு முறையில் தேயிலை ஏலம் விடப்படுகிறது. இதில் உள்நாடு மற்றும் வெளிநாட்டு ஏலதாரர்கள் கலந்து கொண்டு ஆன்லைன் மூலம் தங்களுக்கு தேவையான தேயிலையை ஏலம் எடுத்து வருகிறார்கள். இதன்படி நடைபெற்ற 26-வது ஏல விவரம் வருமாறு:-

இந்த ஏலத்திற்கு 2 லட்சத்து 92 ஆயிரத்து 918 கிலோ தேயிலை தூள் வந்தது. அதில் 2 லட்சத்து 53 ஆயிரத்து 605 கிலோ தேயிலை தூள் ஏலம் போனது. இது மொத்தம் 87 சதவீதம் ஆகும். இதில் 54 ஏலதாரர்கள் கலந்து கொண்டனர்.

ஒரு கிலோ தேயிலை தூளின் விலை 91 ரூபாய் 54 காசு. ஆனால் கடந்த வாரம் ஒரு கிலோ 91 ரூபாய் 48 காசுக்கு ஏலம் போனது. இதன் மூலம் கிலோவுக்கு 6 காசு அதிகரித்துள்ளது. மொத்தம் ரூ.2 கோடியே 32 லட்சத்து 15 ஆயிரத்து 1-க்கு தேயிலைத்தூள் ஏலம் போனது.

இதேபோல இலை ரக தேயிலை ஒரு லட்சத்து 52 ஆயிரத்து 45 கிலோ ஏலத்துக்கு வந்தது. அதில் ஒரு லட்சத்து 16 ஆயிரத்து 797 கிலோ ஏலம் போனது. இது 77 சதவீதம் ஆகும். இதில் 42 ஏலதாரர்கள் கலந்து கொண்டனர். ஒரு கிலோ இலை ரக தேயிலையின் விலை 93 ரூபாய் 31 காசு ஆகும். இது கடந்த வாரம் ரூ.85.84 காசு ஆக இருந்தது.

இதனால் இந்த வாரம் ஒரு கிலோவுக்கு 7 ரூபாய் 47 காசு விலை அதிகரித்தது. இந்த வாரம் ரூ.1 கோடியே 8 லட்சத்து 98 ஆயிரத்து 328-க்கு இலை ரக தேயிலை ஏலம் போனது.

இந்த ஏலத்தில் மொத்தம் 3 லட்சத்து 70 ஆயிரத்து 402 கிலோ தேயிலை தூள் மற்றும் இலைரக தேயிலை ஏலம் போனது. இதன் மொத்த மதிப்பு ரூ.3 கோடியே 41 லட்சத்து 13 ஆயிரத்து 329 ஆகும்.