தென்னிலை அருகே லாரி மீது கார் மோதல்; தாய் சாவு மகன் படுகாயம்

க.பரமத்தி, 

தென்னிலை அருகே லாரி மீது கார் மோதியதில் தாய் பலியானார். அவரது மகன் படுகாயம் அடைந்தார்.

திருப்பூர் பெரியகடை வீதியை சேர்ந்தவர் இதயதுல்லா. இவரது மனைவி சிராஜ் நிஷா(வயது 46). இவர்களது மகன் அப்பாஸ் (27). இவர்கள் பூ வியாபாரம் செய்து வருகின்றனர். நேற்று காலை பூ வாங்குவதற்காக திருப்பூரிலிருந்து நாமக்கல் நோக்கி சென்று கொண்டிருந்தனர். 

காரை அப்பாஸ் ஓட்டினார். கரூர்-கோவை சாலையில் தென்னிலை அருகே எல்லைக்காட்டு வலசு என்ற இடத்தில் கார் சென்ற போது காருக்கு முன்னால் சென்ற லாரி திடீரென வலதுபுறமாக திரும்பியது. இதனால், லாரி மீது மோதாமல் இருக்க அப்பாஸ் பிரேக் பிடித்த போதும் கார் நிற்காமல் லாரியின் மீது மோதி சாலையோரம் தலைக்குப்புற கவிழ்ந்தது. இதில் சிராஜ் நிஷா, அப்பாஸ் ஆகியோர் பலத்த காயமடைந்தனர். 

விபத்தை பார்த்ததும் அந்த வழியாக சென்றவர்கள், படுகாயம் அடைந்தவர்களை மீட்டு தனியார் ஆம்புலன்ஸ் மூலம் திருப்பூர் மாவட்டம் காங்கேயம் அரசு மருத்துவமனைக்கு அனுப்பி வைத்தனர். அங்கு சிராஜ் நிஷாவை பரிசோதித்த டாக்டர்கள் அவர் ஏற்கனவே இறந்து விட்டதாக கூறினர். அப்பாஸ் மருத்துவமனையில் அனுமதிக்கப்பட்டு தீவிர சிகிச்சை அளிக்கப்பட்டு வருகிறது. இந்த விபத்து குறித்து தென்னிலை போலீசார் வழக்குப்பதிவு செய்து விசாரணை நடத்தி வருகின்றனர்.