வியாபாரியை வெட்டிக்கொன்ற வழக்கில் அண்ணன்-தம்பி உள்பட 8 பேர் கைது

பின்னர் அவர்களை போலீஸ் நிலையம் அழைத்து வந்த போலீசார் கொலைக்கு மூளையாக செயல்பட்ட சுந்தரபாண்டியனை பிடித்து விசாரித்தனர். அப்போது அவர் போலீசாரிடம் கொடுத்த பரபரப்பு வாக்குமூலத்தில் கூறியதாவது:-

எனது தந்தை பெருமாள் மணிகண்டனின் கடையில் வேலை பார்த்தார். அவருக்கு வயது மூப்பு ஏற்பட்டதாக கூறி, கடந்த சில மாதங்களுக்கு முன்பு வேலையை விட்டு மணிகண்டன் நிறுத்தினார். அப்போது எனது தந்தையிடம் ரூ.1 லட்சத்து 25 ஆயிரம் கொடுத்தார். 

10 ஆண்டுகளுக்கு மேல் அங்கு வேலை பார்த்த தந்தைக்கு அவர் கொடுத்த தொகை குறைவு ஆகும். இதனால் நானும், எனது தம்பியும் அவரிடம் இது குறித்து கேட்டோம். 

அப்போது எனது தந்தைக்கு ரூ.10 லட்சம் கொடுக்க வேண்டும் அல்லது கடையில் ஒரு பங்குதாரராக அவரையோ அல்லது எங்களையோ சேர்க்க வேண்டும் என்று கூறினோம். அதற்கு மணிகண்டன் சம்மதிக்கவில்லை. இதனால் கடந்த சில மாதங்களாக எங்களுக்குள் பிரச்சினை இருந்து வந்தது.

இந்த நிலையில் தான் பணத்தை கொடுக்காத மணிகண்டனை தீர்த்துக்கட்ட முடிவு செய்தோம். அதன்படி எங்களின் உறவினர்களான திண்டுக்கல் சிலுவத்தூரை சேர்ந்த சின்னையா (29), பொன்மாந்துறை புதுப்பட்டியை சேர்ந்த பாண்டி (29), அன்பழகன் (20), பெருமாள் (23), நல்லாம்பட்டியை சேர்ந்த கணேசன் (35), பஞ்சம்பட்டியை சேர்ந்த கருப்பையா (24) ஆகியோருடன் சேர்ந்து மோட்டார் சைக்கிள்களில் மணிகண்டனின் கடைக்கு சென்றோம்.

பின்னர் நாங்கள் கொண்டு சென்ற கத்தி, அரிவாளால் அவருடைய தலையில் சரமாரியாக வெட்டி கொன்றுவிட்டு தப்பிச்சென்றோம். பழனி பை-பாஸ் சாலையில் ஒரு வீட்டில் பதுங்கி இருந்த போது போலீசாரிடம் சிக்கிக்கொண்டோம்.

இவ்வாறு அவர் கூறினார். 

பணப்பிரச்சினை தொடர்பாக நடந்த இந்த கொலை திண்டுக்கல்லில் பரபரப்பை ஏற்படுத்தியது. கொலை நடந்த 24 மணி நேரத்துக்குள் போலீசார், குற்றவாளிகள் அனைவரையும் கைது செய்துள்ளது குறிப்பிடத்தக்கது.