<
சின்ன வெங்காயம் விலை கடும் வீழ்ச்சி
திண்டுக்கல் மார்க்கெட்டில் நேற்று வரத்து அதிகரிப்பால் சின்ன வெங்காயத்தின் விலை கடும் வீழ்ச்சி அடைந்து கிலோ ரூ.15-க்கு விற்றது.
திண்டுக்கல்:
சின்ன வெங்காயம்
தமிழகத்தில் திண்டுக்கல், ஒட்டன்சத்திரம், கோவை, மதுரை, திருச்சி, பொள்ளாச்சி உள்ளிட்ட பகுதிகளில் வெங்காய மார்க்கெட்டுகள் உள்ளன. இதில் திண்டுக்கல் வெங்காய மார்க்கெட்டை பொறுத்தவரை வாரந்தோறும் திங்கள், புதன், வெள்ளி ஆகிய 3 நாட்கள் நடைபெற்று வருகிறது.
திண்டுக்கல் சுற்றுவட்டார கிராமங்களில் பயிரிடப்படும் சின்ன வெங்காயம் மட்டுமின்றி வெளிமாநிலங்களில் இருந்தும் சின்ன வெங்காயம் திண்டுக்கல் மார்க்கெட்டுக்கு கொண்டு வரப்படுகிறது.
இதனால் திண்டுக்கல்லில் இருந்து கேரளாவுக்கு மட்டுமின்றி மலேசியா, சிங்கப்பூர், இந்தோனேசியா, இலங்கை ஆகிய வெளிநாடுகளுக்கு சின்ன வெங்காயம் ஏற்றுமதி செய்யப்படுகிறது.
விலை வீழ்ச்சி
இந்த நிலையில் வரத்து குறைவால், கடந்த 2 மாதங்களுக்கு முன்பு சின்ன வெங்காயம் கிலோ ரூ.80 வரை விற்பனை ஆனது.
இதற்கிடையே குஜிலியம்பாறை, எரியோடு, கோவிலூர், செங்குறிச்சி, ரெட்டியார்சத்திரம், இடையக்கோட்டை உள்ளிட்ட பகுதிகளில் அதிக பரப்பளவில் சின்ன வெங்காயம் பயிரிடப்பட்டு இருந்தது. அவை விளைச்சல் அடைந்ததால், விவசாயிகள் அறுவடை செய்து மார்க்கெட்டுக்கு கொண்டு வரத்தொடங்கினர்.
இதையடுத்து கடந்த மாதத்தின் தொடக்கத்தில் சின்ன வெங்காயம் கிலோ ரூ.60 ஆக குறைந்தது. அதேநேரம் மாவட்டம் முழுவதும் சின்ன வெங்காயத்தின் அறுவடை தீவிரம் அடைந்தது. மேலும் வெளிநாடுகளுக்கு சின்ன வெங்காயம் ஏற்றுமதி செய்யப்படவில்லை. இதனால் விலை படிப்படியாக குறைந்து கொண்டே வந்தது.
ரூ.15-க்கு விற்பனை
இதற்கிடையே நேற்று மாவட்டத்தின் பல்வேறு பகுதிகள் மற்றும் பெங்களூரு, தாளவாடி உள்ளிட்ட இதர பகுதிகளில் இருந்தும் திண்டுக்கல் மார்க்கெட்டுக்கு சின்ன வெங்காயம் வந்தன. நேற்று ஒரே நாளில் மட்டும் சுமார் 5 ஆயிரம் வெங்காய மூட்டைகள் குவிந்தன. இதனால் சின்ன வெங்காயத்தின் விலை கடும் வீழ்ச்சி அடைந்தது.
இதன் விளைவாக நேற்று ஒரு கிலோ சின்ன வெங்காயம் ரூ.15-க்கு விற்கப்பட்டது. இதனால் விவசாயிகள் அதிர்ச்சி அடைந்தனர். மேலும் வெளிநாடுகளுக்கு ஏற்றுமதி செய்யப்பட்டால் விலை உயரும் என்பதால் அதை எதிர்நோக்கி விவசாயிகளும், வியாபாரிகளும் காத்திருக்கின்றனர்.
Related Tags :
Next Story
"Daily Thanthi" a prestigious product from The Thanthi Trust
எங்களைப்பற்றி தனித்தன்மை பாதுகாப்பு தொடர்புகொள்ள வலைத்தள தொகுப்பு ஆலோசனைகள் வேலைவாய்ப்பு
Paper Ad Tariff Web Ad Tariff Terms & Conditions (E-paper)
காப்புரிமை 2024, © The Thanthi Trust Powered by Hocalwire
