மோட்டார் சைக்கிளில் புகையிலை பொருட்களை கடத்தியவர் கைது

விக்கிரமங்கலம்:

அரியலூர் மாவட்டம் விக்கிரமங்கலம் போலீஸ் சப்-இன்ஸ்பெக்டர் சாமிதுரை மற்றும் போலீசார் குணமங்கலம் பகுதியில் வாகன சோதனையில் ஈடுபட்டனர். அப்போது அந்த வழியாக மோட்டார் சைக்கிளில் பையுடன் வந்தவரை மறித்து சோதனை செய்தனர். அந்த பையில் தடை செய்யப்பட்ட புகையிலை பொருட்கள் இருந்தது கண்டுபிடிக்கப்பட்டது. இதையடுத்து ரூ.4 ஆயிரத்து 500 மதிப்பிலான புகையிலை பொருட்களை போலீசார் கைப்பற்றி பறிமுதல் செய்தனர். மேலும் இது குறித்து புகையிலை பொருட்களை கடத்தி வந்தவரிடம் விசாரித்தபோது, அவர் குணமங்கலம் நடுத்தெருவை சேர்ந்த தினேஷ்குமார்(வயது 26) என்பது தெரியவந்தது. இது குறித்து போலீசார் வழக்குப்பதிவு செய்து மோட்டார் சைக்கிளை பறிமுதல் செய்து தினேஷ்குமாரை கைது செய்து சிறையில் அடைத்தனர்.