தர்மபுரியில் மாவட்ட அளவிலான ஆணழகன் போட்டி

தர்மபுரி:

தர்மபுரியில் மாவட்ட ஆணழகன் சங்கம் மற்றும் மாவட்ட பவர்லிப்டிங் சங்கம் சார்பில் மாவட்ட அளவிலான ஆணழகன் போட்டி நடைபெற்றது. இதில் மாவட்டம் முழுவதிலும் இருந்து 400-க்கும் மேற்பட்ட இளைஞர்கள் கலந்து கொண்டனர். பல்வேறு எடை பிரிவுகளில் நடைபெற்ற இந்த போட்டியில் இளைஞர்கள் தங்களது திறமைகளை வெளிப்படுத்தினர். இந்த போட்டிகளை தர்மபுரி மாவட்ட ஆணழகன் சங்க தலைவர் செல்வராஜ் தொடங்கி வைத்தார். செயலாளர் வேலன் முன்னிலை வகித்தார். இந்த போட்டிகளில் தர்மபுரியை சேர்ந்த விக்னேஷ் ஒட்டு மொத்த சாம்பியன் பட்டத்தை வென்று தர்மபுரி மாவட்ட ஆணழகனாக தேர்வு செய்யப்பட்டார். இதேபோன்று 75 கிலோ எடைப்பிரிவில் தர்மபுரி அரசு கலைக்கல்லூரி மாணவர் தமிழன் மிஸ்டர் தர்மபுரி-2022 பட்டத்தை வென்றார். இந்த போட்டியில் வெற்றி பெற்றவர்களுக்கு டாக்டர் ராஜேஷ், ஆடிட்டர் தேவராஜ், வக்கீல் கோபிநாத் உள்ளிட்ட சிறப்பு விருந்தினர்கள் பரிசு மற்றும் சான்றிதழ்களை வழங்கினர். மாவட்ட அளவில் சாதனை படைத்தவர்கள் ராமநாதபுரம் மாவட்டத்தில் நடைபெறும் மாநில அளவிலான ஆணழகன் போட்டிகளில் கலந்து கொள்ள உள்ளனர் என்பது குறிப்பிடத்தக்கது.