இருதரப்பினர் மோதல் 3 பேர் கைது

சேலம்:-

சேலம் அம்மாபேட்டை கிருஷ்ணன் புதூரை சேர்ந்தவர் ஜெயசூரியன் (வயது 59). கூலி தொழிலாளி. இவர், உடையாப்பட்டியில் டாஸ்மாக் பாரில் மது அருந்தியதாக கூறப்படுகிறது. அப்போது, பக்கத்தில் அமர்ந்து இருந்த அம்மாப்பேட்டை காலனியை சேர்ந்த சோமு மகன் பாலகிருஷ்ணன் (22), ராஜேந்திரன் மகன் இன்னொரு பாலகிருஷ்ணன் (27) ஆகியோரும் மது அருந்தி கொண்டிருந்தனர். இவர்கள் இருவரும் ஜெயசூரியன் வாங்கி வைத்திருந்த சுண்டலை எடுத்து சாப்பிட்டுள்ளனர். இதனை அவர் தட்டி கேட்டுள்ளார். இதனால் ஆத்திரம் அடைந்த அவர்கள் இவரை பீர் பாட்டிலால் அடித்து சரமாரியாக தாக்கியுள்ளனர். இதுபற்றி ஜெயசூரியன் தனது மகன்கள் அருண்பிரசாத், வேல்முருகன் ஆகியோருக்கு செலபோன் மூலம் தகவல் தெரிவித்துள்ளார். அவர்கள் இருவரும் நண்பர் கார்த்திக் என்பவரை அழைத்துக் கொண்டு சம்பவ இடத்திற்கு விரைந்து வந்தனர். பின்னர் அவர்கள் ஜெயசூரியனை தாக்கிய 2 பாலகிருஷ்ணனையும் தாக்கியதாக கூறப்படுகிறது. இந்த மோதல் தொடர்பாக இரு தரப்பினரும் தனித்தனியாக போலீசில் புகார் செய்தனர். புகாரின் பேரில் போலீசார் அருண்பிரசாத் மற்றும் 2 பாலகிருஷ்ணன் ஆகிய 3 பேரை கைது செய்தனர். கார்த்திக், வேல்முருகன் ஆகிய இருவரையும் தேடி வருகின்றனர்.