துபாயில் இருந்து பெங்களூருவுக்கு விமானத்தில் கடத்திய ரூ.36 லட்சம் தங்கம் சிக்கியது

பெங்களூரு:

பெங்களூரு கெம்பேகவுடா சர்வதேச விமான நிலையத்திற்கு துபாயில் இருந்து ஒரு விமானம் வந்தது. அந்த விமானத்தில் தங்கம் கடத்தி வரப்படுவதாக சுங்கத்துறை அதிகாரிகளுக்கு தகவல் கிடைத்தது. இதனால் விமானத்தில் வந்து இறங்கிய பயணிகளை அதிகாரிகள் சோதனைக்கு உட்படுத்தினர். அப்போது ஒரு பயணியின் நடவடிக்கையில் அதிகாரிகளுக்கு சந்தேகம் ஏற்பட்டது.

இதனால் அந்த பயணியை சோதனைக்கு உட்படுத்திய போது அந்த பயணி தனது ஷூ, பேண்ட்டில் மறைத்து வைத்து தங்கத்தை பட்டை போல் மாற்றி கடத்தி வந்தது தெரியவந்தது. இதையடுத்து அந்த பயணியிடம் இருந்து 687.90 கிராம் எடையுள்ள தங்கத்தை அதிகாரிகள் பறிமுதல் செய்தனர். அதன்மதிப்பு ரூ.35 லட்சத்து 42 ஆயிரத்து 685 ஆகும். அந்த பயணியிடம் அதிகாரிகள் தொடர்ந்து விசாரணை நடத்தி வருகின்றனர்.