டெல்லி மதுபான உரிம ஊழல் வழக்கு சி.பி.ஐ. முன்பு ஆஜராக அவகாசம் கோரி கவிதா கடிதம்

ஐதராபாத்,

டெல்லி ஆம் ஆத்மி அரசு தொடர்புடைய மதுபான கடை உரிம ஊழல் வழக்கில் தெலுங்கானா மாநில முதல்-மந்திரி சந்திரசேகர ராவின் மகளும், எம்.எல்.சி.யுமான கவிதாவுக்கு சம்பந்தம் இருப்பது தெரிய வந்தது. டெல்லி கோர்ட்டில் அமலாக்கத்துறை தாக்கல் செய்த அறிக்கையில், ரூ.100 கோடி லஞ்சம் கைமாறிய விவகாரத்தில் கவிதா பெயர் இடம்பெற்றது.

6-ந்தேதி (இன்று) காலை 11 மணிக்கு விசாரணைக்கு ஆஜராகுமாறு கவிதாவுக்கு சி.பி.ஐ. நோட்டீஸ் அனுப்பி இருந்தது.

இந்தநிலையில், விசாரணைக்கு ஆஜராக கவிதா கால அவகாசம் கோரியுள்ளார். அவர் சி.பி.ஐ.க்கு எழுதிய கடிதத்தில் கூறியிருப்பதாவது:-

முன்பே ஒப்புக்கொண்ட நிகழ்ச்சிகள் இருப்பதால், 6-ந் தேதி என்னால் ஆஜராக முடியாது. அதற்கு பதிலாக, 11, 12, 14 மற்றும் 15 ஆகிய தேதிகளில் எது உங்களுக்கு வசதியானதோ, அந்த தேதியில் ஐதராபாத்தில் உள்ள எனது இல்லத்தில் விசாரணைக்கு ஆஜராக தயாராக இருக்கிறேன்.

இவ்வாறு அவர் கூறியுள்ளார்.