மேட்டூர் அணைக்கு நீர்வரத்து வினாடிக்கு 2,566 கனஅடியாக குறைந்தது

மேட்டூர்,

கர்நாடக மாநிலத்தில் உள்ள அணைகளான கபினி மற்றும் கிருஷ்ணராஜசாகர் அணைகளில் இருந்து கடந்த மாதம் இறுதியில் தண்ணீர் திறந்து விடப்பட்டது. இந்த தண்ணீர் கடந்த 8-ந் தேதி மேட்டூர் அணையை வந்தடைந்தது. இதைத்தொடர்ந்து மேட்டூர் அணைக்கு படிப்படியாக நீர்வரத்து அதிகரித்தது.

குறிப்பாக 8-ந் தேதி மாலை அணைக்கு வினாடிக்கு 1,000 கனஅடி வீதம் வந்து கொண்டிருந்த நீர்வரத்து நேற்று முன்தினம் அதிகபட்சமாக வினாடிக்கு 3,501 கனஅடியாக இருந்தது. இதன்காரணமாக மேட்டூர் அணையின் நீர்மட்டமும் படிப்படியாக அதிகரித்து நேற்று முன்தினம் காலையில் 24.55 அடியாக உயர்ந்தது.

இதனிடையே அணையில் இருந்து குடிநீர் தேவைக்காக வினாடிக்கு 500 கனஅடி வீதம் திறந்து விடப்பட்ட தண்ணீர் கடந்த 13-ந் தேதி இரவு முதல் வினாடிக்கு 1,200 கனஅடியாக அதிகரிக்கப்பட்டது. தற்போது தண்ணீர் திறப்பு அதிகரிக்கப்பட்டுள்ள நிலையில், அணைக்கு நீர்வரத்து வினாடிக்கு 2,566 கனஅடியாக நேற்று குறைந்துள்ளது. நேற்று காலை நிலவரப்படி அணை நீர்மட்டம், 24.88 அடியாக இருந்தது.

இதனால் வேகமாக உயர்ந்து வந்த அணையின் நீர்மட்டம் தற்போது மெதுவாக உயர வாய்ப்புள்ளது.