5 போலீசார் அதிரடியாக மாற்றம்

தலைமை ஆசிரியை வீட்டில் கொள்ளை சம்பவம் நடந்த இரவில் பணியில் இருந்த 5 போலீசாரை பணியிட மாற்றம் செய்து போலீஸ் சூப்பிரண்டு கார்த்திகேயேன் உத்தரவிட்டுள்ளார்.

தலைமை ஆசிரியை வீட்டில் கொள்ளை

திருவண்ணாமலை மாவட்டம் கலசபாக்கம் தாலுகா விண்ணுவாம்பட்டு கிராமத்தை சேர்ந்தவர் தேவன். இவரது மனைவி சுந்தரி (வயது 50), அரசு பள்ளியில் தலைமை ஆசிரியையாக பணிபுரிந்து வருகிறார்.

இந்த நிலையில் கடந்த 19-ந்தேதி சென்னையில் உள்ள மருத்துவமனையில் சிகிச்சை பெற்று வரும் உறவினரை பார்ப்பதற்காக தேவன் குடும்பத்துடன் சென்னைக்கு சென்றார்.

பின்னர் வீட்டிற்கு திரும்பினர். அப்போது வீட்டின் பூட்டு உடைக்கப்பட்டு கிடப்பதை கண்டு அதிர்ச்சி அடைந்த அவர்கள், உள்ளே சென்று பார்த்த போது, வீட்டில் இருந்த 70 பவுன் நகை, 3 கிலோ வெள்ளி பொருட்கள் மற்றும் ரூ.2 லட்சம் ரொக்கம் ஆகியவற்றை மர்ம நபர்கள் கொள்ளையடித்து சென்றது தெரியவந்தது.

5 போலீசார் பணியிட மாற்றம்

இதுகுறித்து கலசபாக்கம் போலீசார் வழக்குப்பதிவு செய்து விசாரணை நடத்தி வருகின்றனர்.

இந்த நிலையில் சம்பவத்தன்று இரவு ரோந்து பணியில் இருந்த கலசபாக்கம் போலீஸ் நிலையத்தை சேர்ந்த 5 போலீசாரை திருவண்ணாமலை மாவட்ட ஆயுதப்படை பிரிவுக்கு பணியிட மாற்றம் செய்து போலீஸ் சூப்பிரண்டு கார்த்திகேயன் உத்தரவிட்டுள்ளார்.

இந்த சம்பவம் போலீஸ் வட்டாரத்தில் பரபரப்பை ஏற்படுத்தி உள்ளது.