வைத்தீஸ்வரன் கோவில் பேரூராட்சி கூட்டம்

மயிலாடுதுறை மாவட்டம், வைத்தீஸ்வரன் கோவில் பேரூராட்சி மன்ற கூட்டம் தலைவர் பூங்கொடி அலெக்சாண்டர் தலைமையில் நடந்தது. செயல் அலுவலர் அசோகன், துணைத்தலைவர் அன்புச்செழியன் ஆகியோர் முன்னிலை வகித்தனர். கூட்டத்தில் பல்வேறு தீர்மானங்கள் நிறைவேற்றப்பட்டன.

கூட்டத்தில் உறுப்பினர்கள் பேசியதாவது:-

ராஜா கார்த்திகேயன் (அ.தி.மு.க):-பேரூராட்சி பகுதியில் இரண்டு இடங்களில் குடிநீர் தொட்டி அமைப்பதற்கு ரூ.14 லட்சம் கூடுதலாக நிதி ஒதுக்கீடு செய்யப்பட்டுள்ளது. இதுகுறித்து விளக்கம் அளிக்க வேண்டும்.

செயல் அலுவலர்:-வைத்தீஸ்வரன் கோவில் பேரூராட்சி பகுதியில் 2 இடங்களில் ரூ.14 லட்சம் மதிப்பீட்டில் குடிநீர் குழாய் அமைப்பதற்கு உத்தேச திட்ட மதிப்பீடு தயார் செய்யப்பட்டுள்ளது. பூமியில் குறைவான அடியில் குடிநீர் கிடைத்தால் நிதி குறையும். இதில் தவறு நடக்க வாய்ப்பில்லை.

ஆக்கிரமிப்பு

கென்னடி (தி.மு.க):-வைத்தீஸ்வரன் கோவில் பகுதியில் சாலைகளை ஆக்கிரமித்து கடைகள் அமைக்கப்பட்டுள்ளது. அந்த ஆக்கிரமிப்புகளை அகற்ற வேண்டும்.

விந்தியாதேவி சுரேஷ் (இந்திய கம்யூனிஸ்டு கட்சி):- எனது வார்டு பகுதியில் கூடுதலாக குடிநீர் வசதி, தெருவிளக்கு வசதி செய்து தர வேண்டும்.

கவிதா (தி.மு.க):- தட்டுப்பாடு இன்றி குடிநீர் வசதி செய்து தர வேண்டும்

சியாமளாதேவி (தி.மு.க):- ரெயில்வே ரோடு பகுதியில் கூடுதலாக தெருவிளக்கு வசதி செய்து தர வேண்டும்.

துணைத் தலைவர்:-வைத்தீஸ்வரன் கோவில் நான்கு வீதிகளும் தேரோடும் வீதியாக உள்ளது. அடிக்கடி மின் இணைப்புகளை துண்டித்து தேரை இழுக்க வேண்டிய நிலை உள்ளது. எனவே, நான்கு வீதிகளிலும் உள்ள மின்கம்பிகளை பூமிக்கு அடியில் அமைப்பதற்கு நடவடிக்கை எடுக்க வேண்டும்.

அனைவருக்கும் குடிநீர்

தலைவர்:- நிதி நிலைமைக்கேற்ப வளர்ச்சி பணிகள் மேற்கொள்ளப்படும். 2.0 திட்டத்தின் கீழ் சுமார் ரூ.40 லட்சம் மதிப்பீட்டில் கொள்ளிடம் கூட்டுக் குடிநீர் திட்டத்தின் கீழ் அனைவருக்கும் குடிநீர் கிடைக்க நடவடிக்கை எடுக்கப்படும் என்றார்.