சட்டக்கல்லூரி மாணவர் கொலையில் 6 பேர் கைது

சிவகங்கை மாவட்டம், மானாமதுரையில் உள்ள பயணியர் விடுதி எதிரே உள்ள தெருவை சேர்ந்தவர் தங்கமணி. இவருடைய மகன் அக்னிராஜ்(வயது 20). இவர் மதுரை சட்டக்கல்லூரியில் முதலாம் ஆண்டு படித்து வந்தார்.
இந்த நிலையில் நேற்று முன்தினம் காலை அவர் மானாமதுரை போலீஸ் நிலையத்திற்கு கையெழுத்து போடுவதற்காக மோட்டார் சைக்கிளில் வந்திருந்தார். அங்கு கையெழுத்து போட்டு விட்டு அக்னிராஜ் புறப்பட்டார்.
அப்போது 2 மோட்டார் சைக்கிளில் வந்த 6 பேர் போலீஸ் நிலையம் அருகே அக்னிராஜை வழிமறித்து வாள் மற்றும் அரிவாளால் சரமாரியாக வெட்டி விட்டு அங்கிருந்து தப்பி ஓடி விட்டனர். இதில் சம்பவ இடத்திலேயே அவர் பரிதாபமாக இறந்தார்.
இந்த கொலை தொடர்பாக போலீசார் தீவிர விசாரணை நடத்தினார்கள். கொலை தொடர்பாக மானாமதுரை உடைகுளம் பகுதியை சேர்ந்த தர்மராஜ்(25), அருண் (எ) பூச்சி இருளப்பன், சக்திவேல்(21), பழையனூர் தாழிக்குளம் பகுதியைச் சேர்ந்த விக்கி (எ) விக்னேஷ்வரன் ஆகிய 4 பேரை நேற்று முன்தினம் போலீசார் கைது செய்தனர்,
மேலும் சிவகங்கை காமராஜர் காலனி ஆகாஷ் (25), சிவகங்கை மட்டாகுளம் பொன்னையன் (22) ஆகிய 2 பேரை போலீசார் நேற்று கைது செய்தனர். கைதானவர்களிடம் போலீசார் விசாரணை நடத்தி வருகின்றனர்.