நடிகர் ரஜினிகாந்த் அறுவை சிகிச்சை செய்து கொண்ட தனது சகோதரருடன் சந்திப்பு

நடிகர் ரஜின்காந்தின் சகோதரர் சத்யநாராயண ராவ் கெய்க்வாட் (வயது 77).  இவருக்கு முழங்காலில் கடுமையான ஆஸ்டியோ ஆர்த்ரைட்டிஸ் பாதிப்பு இருந்து வந்தது.

இதனை அடுத்து அவருக்கு இன்று மூட்டு மாற்று அறுவை சிகிச்சை நடந்தது.  மும்பையில் தர்பார் படத்திற்கான படப்பிடிப்பு பணிகளில் ஈடுபட்டிருந்த நடிகர் ரஜினிகாந்த் உடனடியாக பெங்களூருவுக்கு புறப்பட்டு வந்து, மருத்துவமனைக்கு நேரில் சென்று சகோதரரை சந்தித்து நலம் விசாரித்தார்.

இந்த சிகிச்சைக்கு பின் தனியார் மருத்துவமனை மருத்துவர் கிரண் சவுகா கூறும்பொழுது, சத்யநாராயணா நலமுடன் உள்ளார்.  அறுவை சிகிச்சை நடந்து முடிந்த அன்றே நடந்து செல்லும் வகையில் உடற்தகுதியுடன் அவர் இருக்கிறார் என தெரிவித்து உள்ளார்.

இந்த சந்திப்பிற்கு பின் நடிகர் ரஜினிகாந்த், அவரது சகோதரர் மற்றும் மருத்துவர்கள் உள்ளிட்டோர் சிகிச்சை வெற்றிகரமுடன் முடிந்தது என்பது வெளிப்படும் வகையில் தங்களது கட்டை விரலை உயர்த்தி காட்டினர்.  அங்கிருந்த மருத்துவர்களுடன் நடிகர் ரஜினிகாந்த் செல்பி எடுத்து கொண்டார்.