காஷ்மீரில் இயல்பு வாழ்க்கை தொடர்ந்து பாதிப்பு

ஸ்ரீநகர்,

காஷ்மீரில், கடந்த மாதம் 5-ந் தேதி சிறப்பு அந்தஸ்து ரத்து செய்யப்பட்டதை தொடர்ந்து அங்கு இயல்பு வாழ்க்கை பாதிக்கப்பட்டுள்ளது. நேற்று 56-வது நாளாக இயல்பு வாழ்க்கை முடங்கியது. ஊரடங்கு உத்தரவு அமலில் இல்லை. இருப்பினும், 144 தடை உத்தரவு அமலில் இருப்பதால், மக்கள் இயல்பாக நடமாட முடியவில்லை.

ஸ்ரீநகரில் ஷெஹார் இ காஷ்மீர் பகுதியில் பல இடங்களில் கல் வீச்சு சம்பவங்கள் நடந்தன. ஆர்ப்பாட்டக்காரர்கள் மீது பாதுகாப்பு படையினர் தடியடி நடத்தினர். கண்ணீர்புகை குண்டுகளை வீசினர்.

சாதாரண தொலைபேசி செயல்பட தொடங்கியது. இருந்தாலும், மொபைல் போன், இணையதள வசதிகள் இன்னும் முடக்கி வைக்கப்பட்டுள்ளன.