ஏரல் அருகே முத்தாரம்மன் கோவில் கொடைவிழா- திருவிளக்கு பூஜை

ஏரல் அருகே உள்ள இடையர்காடு கிராமத்தில் முத்தாரம்மன் கோவில் கொடைவிழாவை முன்னிட்டு கடந்த வாரம் செவ்வாய் கிழமை கால்நாட்டு விழா நடைபெற்றது. நேற்று மாலை 7 மணிக்கு திருவிளக்கு பூஜை நடைபெற்றது. கோவை தொழிலதிபர் அஜித்ராஜ், அவரது மனைவி மகேஸ்வரி மற்றும் குடும்பத்தினர் பூஜையை தொடங்கி வைத்தனர்.

திருவிளக்கு பூஜையில் 300க்கும் மேற்பட்ட பெண்கள் கலந்து கொண்டு குத்து விளக்கேற்றி அம்மனை வழிபட்டனர். திருவிளக்கு பூஜையில் கலந்து கொண்ட பெண்கள் அனைவருக்கும் சேலை மற்றும் பூஜை பொருட்கள் வழங்கப்பட்டன. முன்னதாக இரவு 6 மணிக்கு ஆன்மீக சொற்பொழிவு நடை பெற்றது. இன்று திங்கள் மாலை 6 மணிக்கு சுமங்கலி பூஜையும், அதை தொடர்ந்து 9 மணிக்கு நவீன வில்லிசை நிகழ்ச்சியும் நடை பெறுகிறது.

கொடைவிழா

நாளை செவ்வாய்கிழமை கொடைவிழாவை முன்னிட்டு காலை தாமிரபரணி ஆற்றிலிருந்து புனித நீர் தீர்த்தம் எடுத்து வருதல், அதை தொடர்ந்து கணபதி ஹோமம், சுதர்சன ஹோமம், யாகபூஜை, மகாலட்சுமி பூஜையைத் தொடர்ந்து கோபுர கலசங்களில் புனித நீர் ஊற்றப்பட்டு அபிஷேகம் செய்யப்படுகிறது. அதை தொடர்ந்து அம்மன் மற்றும் பரிவார மூர்த்திகளுக்கு புனித நீர் அபிஷேகம் நடைபெறுகிறது. பகல் 1 மணிக்கு சிறப்பு அம்மனுக்கு அலங்காரம் செய்யப்பட்டு, மதிய பூஜை நடைபெறுகிறது. மாலை 6 மணிக்கு நையாண்டி மேளம், வாண வேடிக்கையுடன் முளைப்பாரி எடுத்து வருதல் நிகழ்ச்சியும், அதை தொடர்ந்து கரகாட்டம், நவீன வில்லிசை நிகழ்ச்சியும் நடைபெறுகிறது.

சாமக்கொடை

இரவு 12 மணிக்கு அம்மன் மற்றும் பரிவார மூர்த்திகளுக்கு சிறப்பு அலங்காரம் செய்யப்பட்டு தீபாராதனையும் பூஜைகளும், இரவு 2.30 மணிக்கு சாமக்கொடையும் நடைபெறுகிறது. அதைத் தொடர்ந்து சப்பரத்தில் உற்சவர் முத்தாரம்மன் வாண வேடிக்கையுடன் வீதி உலா வந்து பக்தர்களுக்கு அருள்பாலிக்கிறார். இப்போது பக்தர்கள் தேங்காய் பழம் படைத்து அம்மனை வழிபடுவார்கள். கொடைவிழா நாட்களில் காலை, மாலை, இரவு அன்னதானம் வழங்கப்படுகிறது. நாளை மறுநாள் (புதன்கிழமை) மதியம் 12 மணிக்கு மதிய கொடையும். இரவு 7 மணிக்கு பல்சுவை நிகழ்ச்சியும் நடைபெறுகிறது. நிகழ்ச்சிக்கான ஏற்பாடுகளை கோவில் நிர்வாகத்தினர் மற்றும் ஊர் பொதுமக்கள் செய்திருந்தனர்.