ஐ.சி.சி.டெஸ்ட் கிரிக்கெட் தரவரிசை: பேட்டிங்கில் இந்திய வீரர்கள் முன்னேற்றம்

துபாய்,

இந்தியா-இங்கிலாந்து இடையிலான 5 ஆட்டங்கள் கொண்ட டெஸ்ட் தொடரின் முதல் போட்டி சமீபத்தில் முடிவடைந்தது. இதில் இங்கிலாந்து 5 விக்கெட்டுகள் வித்தியாசத்தில் வெற்றி பெற்றது.

இந்த போட்டியில் வீரர்களின் செயல்பாடுகளை கணக்கில் கொண்டு டெஸ்ட் கிரிக்கெட்டில் வீரர்களுக்கான புதிய தரவரிசை பட்டியலை சர்வதேச கிரிக்கெட் கவுன்சில் (ஐ.சி.சி.) வெளியிட்டுள்ளது.

இதில் பேட்ஸ்மேன்கள் தரவரிசையில் முதல் 6 இடங்களில் மாற்றமில்லை. ஜோ ரூட் முதலிடத்திலும், ஹாரி புரூக் 2-வது இடத்திலும், வில்லியம்சன் 3-வது இடத்திலும், ஜெய்ஸ்வால் 4-வது இடத்திலும், ஸ்டீவ் சுமித் 5-வது இடத்திலும், டெம்பா பவுமா 6-வது இடத்திலும் தொடருகின்றன.

இந்த வரிசையில் குறிப்பிடத்தக்க மாற்றமாக இங்கிலாந்துக்கு எதிரான முதல் டெஸ்டின் 2 இன்னிங்ஸ்களிலும் சதமடித்து அசத்திய ரிஷப் பண்ட் ஒரு இடம் முன்னேறி 7-வது இடத்தை பிடித்துள்ளார். அதேபோல் அந்த போட்டியில் சதமடித்து இங்கிலாந்தின் வெற்றியில் முக்கிய பங்கு வகித்த பென் டக்கெட் 5 இடங்கள் முன்னேறி 8-வது இடத்தை பிடித்துள்ளார். இந்திய கேப்டன் சுப்மன் கில் 20-வது இடத்திலும் (5 இடம் உயர்வு), லோகேஷ் ராகுல் 38-வது இடத்திலும் (10 இடம் ஏற்றம்) உள்ளனர்.

பந்து வீச்சாளர் தரவரிசையில் பெரிய அளவில் மாற்றமில்லை. இந்திய வேகப்பந்து வீச்சாளர் ஜஸ்பிரித் பும்ரா நம்பர் 1 இடத்தில் நீடிக்கிறார்.

ஆல்-ரவுண்டர்கள் தரவரிசையில் இந்தியாவின் ரவீந்திர ஜடேஜா முதலிடத்தில் நீடிக்கிறார். இதில் இங்கிலாந்து கேப்டன் பென் ஸ்டோக்ஸ் 3 இடங்கள் முன்னேறி 5-வது இடத்திற்கு வந்துள்ளார்.