ஒருநாள் கிரிக்கெட்: ஆஸ்திரேலியாவுக்கு எதிராக தென் ஆப்பிரிக்கா மாபெரும் சாதனை

சிட்னி,

தென் ஆப்பிரிக்க கிரிக்கெட் அணி ஆஸ்திரேலியாவில் சுற்றுப்பயணம் மேற்கொண்டு 3 போட்டிகள் கொண்ட ஒருநாள் தொடரில் விளையாடியது. இதில் கெய்ன்சில் நடந்த முதலாவது ஆட்டத்தில் 98 ரன் வித்தியாசத்திலும், மெக்காயில் நடந்த 2-வது ஆட்டத்தில் 84 ரன் வித்தியாசத்திலும் தென் ஆப்பிரிக்கா வெற்றி பெற்று தொடரை கைப்பற்றியது.

இதனையடுத்து இவ்விரு அணிகள் இடையிலான 3-வது மற்றும் கடைசி ஒருநாள் கிரிக்கெட் போட்டி மெக்காய் நகரில் இன்று நடைபெற்றது. இதில் டாஸ் வென்று முதலில் பேட்டிங் செய்த ஆஸ்திரேலிய அணி 50 ஓவர்களில் 2 விக்கெட்டுகளை இழந்து 431 ரன்கள் குவித்தது. டிராவிஸ் ஹெட் (142 ரன்கள்), மிட்செல் மார்ஷ் (100 ரன்கள்), கேமரூன் கிரீன் (118 ரன்கள்) ஆகியோர் சதமும், அலெக்ஸ் கேரி அரைசதமும் (50 ரன்கள்) அடித்தனர்.

பின்னர் 432 ரன்கள் அடித்தால் வெற்றி என்ற கடின இலக்கை நோக்கி களமிறங்கிய தென் ஆப்பிரிக்க அணி வெறும் 24.5 ஓவர்கள் மட்டுமே தாக்குப்பிடித்த நிலையில் 155 ரன்களில் ஆல் அவுட் ஆனது. இதன் மூலம் 276 ரன்கள் வித்தியாசத்தில் ஆஸ்திரேலியா அபார வெற்றி பெற்றது.

தென் ஆப்பிரிக்கா தரப்பில் அதிகபட்சமாக பிரெவிஸ் 49 ரன்கள் அடித்தார். ஆஸ்திரேலியா தரப்பில் கூப்பர் கனோலி 5 விக்கெட்டுகளும், சேவியர் பார்ட்லெட் மற்றும் சீன் அபோட் தலா 2 விக்கெட்டுகளும் வீழ்த்தினர்.

இதன் மூலம் 3 போட்டிகள் கொண்டஒருநாள் தொடரை தென் ஆப்பிரிக்கா 2-1 என்ற கணக்கில் கைப்பற்றியது.

ஆஸ்திரேலியாவுக்கு எதிரான ஒருநாள் தொடரை தென் ஆப்பிரிக்கா கைப்பற்றுவது இது 9-வது முறையாகும். இதன் மூலம் ஒருநாள் கிரிக்கெட் வரலாற்றில் ஆஸ்திரேலியாவுக்கு எதிராக அதிக தொடர்களை வென்ற அணி என்ற மாபெரும் சாதனையை தென் ஆப்பிரிக்கா படைத்துள்ளது. இதில் இந்தியா 6 வெற்றிகளுடன் 3-வது இடத்தில் உள்ளது.

அந்த பட்டியல்:

1. தென் ஆப்பிரிக்கா - 9 வெற்றி

2. இங்கிலாந்து - 8 வெற்றி

3. இந்தியா - 6 வெற்றி

4. இலங்கை/பாகிஸ்தான் - 4 வெற்றி