ஷராபு, முகமது வசீம் அரைசதம்; ஓமனுக்கு 173 ரன்கள் இலக்கு நிர்ணயித்த யுஏஇ
ஐக்கிய அரபு அமீரகம் தரப்பில் அதிகபட்சமாக முகமது வசீம் 69 ரன்கள் எடுத்தார்.;
Image Courtesy: @ACCMedia1 / X (Twitter) / File Image
துபாய்,
17-வது ஆசிய கோப்பை கிரிக்கெட் போட்டி (20 ஓவர்) ஐக்கிய அரபு அமீரகத்தில் உள்ள துபாய் மற்றும் அபுதாபியில் நடந்து வருகிறது. இந்த தொடரில் இன்று இரண்டு லீக் ஆட்டங்கள் நடக்கின்றன. இதில் மாலை 5.30 மணிக்கு தொடங்கி நடந்து வரும் முதல் ஆட்டத்தில் ஐக்கிய அரபு அமீரகம்- ஓமன் அணிகள் ஆடி வருகின்றன.
இந்த ஆட்டத்திற்கான டாசில் வென்ற ஓமன் அணி முதலில் பந்துவீசுவதாக அறிவித்தது. தொடர்ந்து யுஏஇ அணியின் தொடக்க வீரர்களாக அலிஷான் ஷராபு மற்றும் முகமது வசீம் களம் கண்டனர். இதில் அலிஷான் ஷராபு அரைசதம் அடித்த நிலையில் 51 ரன்களில் அவுட் ஆனார்.
தொடர்ந்து களம் கண்ட ஆசிப் கான் 2 ரன்னிலும், முகமது ஜோஹைப் 21 ரன்னிலும் அவுட் ஆகினர். மறுபுறம் நிதான ஆட்டத்தை வெளிப்படுத்திய முகமது வசீம் அரைசதம் அடித்து அசத்தினார். இறுதியில் யுஏஇ அணி 20 ஓவரில் 5 விக்கெட்டை இழந்து 172 ரன்கள் எடுத்தது. ஐக்கிய அரபு அமீரகம் தரப்பில் அதிகபட்சமாக முகமது வசீம் 69 ரன்கள் எடுத்தார்.
ஓமன் தரப்பில் அதிகபட்சமாக ஜிதேன் ராமானந்தி 2 விக்கெட் வீழ்த்தினார். தொடர்ந்து 173 ரன் எடுத்தால் வெற்றி என்ற இலக்குடன் ஓமன் அணி ஆட உள்ளது.