ஹனுமான் படத்தில் ஆவேசத்துடன் வரலட்சுமி..!

சென்னை,

விக்னேஷ் சிவன் இயக்கிய ‘போடா போடி’ படத்தின் மூலம் அறிமுகமான வரலட்சுமி சரத்குமார் கதாநாயகியாக மட்டுமன்றி வில்லி வேடங்களிலும் துணிச்சலாக நடித்து வருகிறார். இதனால் அவருக்கு பட வாய்ப்புகள் அதிகமாக வருகிறது. மேலும் தெலுங்கு, கன்னட படங்களிலும் நடித்து இருக்கிறார்.

தற்போது 6-க்கும் மேற்பட்ட படங்கள் கைவசம் வைத்துள்ளார். ஹனுமான் என்ற தெலுங்கு படத்தில் நடிக்கவும் ஒப்பந்தம் செய்துள்ளனர். இந்த படத்தை பிரபல தெலுங்கு இயக்குனர் பிரசாந்த் வர்மா இயக்குகிறார். இதில் தேஜா சஜ்ஜா கதாநாயகனாக வருகிறார். முதல் தெலுங்கு சூப்பர் ஹீரோ படமாக இது உருவாகிறது. இந்த படத்தை தெலுங்கில் மட்டுமன்றி தமிழ், இந்தி, கன்னடம், மலையாளம் ஆகிய மொழிகளிலும் வெளியிட திட்டமிட்டு உள்ளனர். 

ஹனுமான் படத்தில் தேங்காய் குலையை கையில் பிடித்தபடி ரவுடிகளுடன் ஆவேசமாக வரலட்சுமி மோதும் முதல் தோற்ற புகைப்படத்தை படக்குழுவினர் வலைத்தளத்தில் வெளியிட்டு உள்ளனர். இந்த புகைப்படம் தற்போது வைரலாகிறது.