கேரள பட விழாவில் சிவகுமார் படம்

கேரளாவில் வருடந்தோறும் சர்வதேச திரைப்பட விழா நடத்தப்படுகிறது. இந்த ஆண்டுக்கான விழா நாளை மறுநாள் 18-ந் தேதி தொடங்கி 25-ந் தேதி வரை நடக்கிறது. கேரள முதல்-மந்திரி பினராய் விஜயன் தொடங்கி வைக்கிறார்.

இந்த திரைப்பட விழாவில் வெளிநாடுகள் மற்றும் இந்திய மொழிகளில் வெளியான 180 சிறந்த திரைப்படங்கள் 14 தியேட்டர்களில் திரையிடப்படுகின்றன. சில மாதங்களுக்கு முன்பு மறைந்த பிரபல மலையாள டைரக்டர் கே.எஸ்.சேதுமாதவனுக்கு மரியாதையும், அஞ்சலியும் செலுத்தும் வகையில் அவர் தமிழில் இயக்கிய மறுபக்கம் படமும் கேரள சர்வதேச திரைப்பட விழாவில் திரையிடப்படுகிறது.

1991-ல் வெளியான மறுபக்கம் படத்தில் சிவகுமார் கதாநாயகனாகவும் ராதா, ஜெயபாரதி ஆகியோர் கதாநாயகிகளாகவும் நடித்து இருந்தனர். இந்த படம் தேசிய விருதுகளை வென்றது.

மறுபக்கம் படத்தை திரையிடும் நிகழ்ச்சியில் கலந்துகொள்ள நடிகர் கமல்ஹாசனை அழைக்க இருப்பதாக விழாக் குழுவினர் தெரிவித்து உள்ளனர். கமல்ஹாசன் நடித்துள்ள நம்மவர் படத்தையும் சேதுமாதவன் இயக்கி இருந்தார்.