வேட்பாளர்களை, சித்தராமையா அறிவிப்பது சரியல்ல

கொப்பல்:-

கொப்பல் மாவட்டம் குஸ்டகியில் காங்கிரஸ் செயல் தலைவர் சதீஸ் ஜார்கிகோளி, நிருபர்களிடம் கூறியதாவது:-

காங்கிரஸ் கட்சி சார்பில் அடுத்த ஆண்டு நடைபெறும் சட்டசபை தேர்தலில் போட்டியிட விருப்பம் உள்ளவர்கள், விண்ணப்ப மனு கொடுத்துள்ளனர். வேட்பாளர்களை தேர்வு செய்யும் பணிகளில் காங்கிரஸ் தலைவர்கள் ஈடுபட்டுள்ளனர். இந்த சந்தர்ப்பத்தில் எதிர்க்கட்சி தலைவர் சித்தராமையா பொதுக்கூட்ட மேடைகளில் சட்டசபை தேர்தலில் போட்டியிடும் வேட்பாளர்களை அறிவித்து வருவது சரியல்ல. ஏனெனில் ஒரு தொகுதியில் போட்டியிட விருப்பம் தெரிவித்து பல பிரமுகர்கள் விண்ணப்ப மனுக்களை அளித்துள்ளனர்.

224 தொகுதிகளிலும் போட்டியிட விருப்பம் தெரிவித்து ஆயிரக்கணக்கானார் மனு அளித்திருக்கிறார்கள். அவர்கள் தங்களுக்கும் கட்சி சார்பில் போட்டியிட வாய்ப்பு கிடைக்கும் என்று எதிர்பார்த்து காத்திருக்கின்றனர். இந்த சந்தர்ப்பத்தில் குறிப்பிட்ட தொகுதிகளில் போட்டியிடுபவர்களை பகிரங்கரமாக வேட்பாளராக அறிவிப்பதால், அங்கு போட்டியிட நினைத்த காங்கிரஸ் பிரமுகர்கள் பாதிக்கப்படுவார்கள். அதனால் சித்தராமையா வேட்பாளர்களை மேடையில் அறிவிப்பது சரியில்ல.

இவ்வாறு அவர் கூறினார்.