போதை விருந்து வழக்கு: தெலுங்கு நடிகை ஹேமா கைது

பெங்களூரு,

பெங்களூரு எலெக்ட்ரானிக் சிட்டி அருகே ஆனேக்கல் தாலுகா ஹெப்பகோடி போலீஸ் எல்லைக்கு உட்பட்ட பகுதியில் உள்ள கோபால ரெட்டி என்பவரது பண்ணை வீட்டில் கடந்த மாதம் (மே) 19-ந் தேதி போதை விருந்து நடைபெற்றிருந்தது. இந்த போதை விருந்தில் தெலுங்கு நடிகை ஹேமா உள்பட 101 பேர் பங்கேற்று இருந்தார்கள். இந்த விருந்தில் கலந்து கொண்டவர்கள் போதைப்பொருட்கள் பயன்படுத்தியது பெங்களூரு மத்திய குற்றப்பிரிவு போலீசார் நடத்திய சோதனையில் கண்டுபிடிக்கப்பட்டது.

இதையடுத்து, விருந்துக்கு ஏற்பாடு செய்த வாசு, போதைப்பொருள் வியாபாரிகள் உள்பட 5 பேரை மத்திய குற்றப்பிரிவு போலீசார் கைது செய்தனர். அத்துடன் விருந்தில் பங்கேற்றவர்களுக்கு போலீசார் மருத்துவ பரிசோதனை செய்தனர். அதில் போதை விருந்தில் பங்கேற்ற 101 பேரில், நடிகை ஹேமா உள்பட 88 பேர் போதைப்பொருட்கள் பயன்படுத்தியது மருத்துவ பரிசோதனையில் உறுதியானது. இதையடுத்து, விசாரணைக்கு ஆஜராகும்படி நடிகை ஹேமா உள்பட 8 பேருக்கு போலீசார் நோட்டீஸ் அனுப்பினார்கள்.

அதாவது கடந்த மாதம் 27-ந் தேதி ஹேமாவுக்கு நோட்டீஸ் அனுப்பப்பட்டது. ஆனால் உடல் நலக்குறைவால், தன்னால் ஒரு வாரம் விசாரணைக்கு ஆஜராக முடியாது என்றும், கால அவகாசம் வழங்கும்படியும் ஹேமா கேட்டு இருந்தார். இதையடுத்து, கடந்த 1-ந் தேதி விசாரணைக்கு ஆஜராகும்படி நடிகை ஹேமா உள்பட 8 பேருக்கு 2-வது முறையாக போலீசார் நோட்டீஸ் அனுப்பி வைத்திருந்தார்கள். ஆனால் ஹேமா உள்பட 8 பேரும் போலீஸ் விசாரணைக்கு ஆஜராகவில்லை.

இதனால் விசாரணைக்கு ஆஜராகாமல் இருந்து வரும் நடிகை ஹேமா உள்பட 8 பேருக்கும் கைது வாரண்டு பிறப்பிக்க குற்றப்பிரிவு போலீசார் முடிவு செய்து நடவடிக்கை எடுத்து வருகின்றனர்.

இந்த நிலையில் தெலுங்கு நடிகை ஹேமா பெங்களூரு சாம்ராஜ்பேட்டையில் உள்ள குற்றப்பிரிவு போலீசார் அலுவலகத்தில் ஆஜரானார். இன்று மாலை சுமார் 4 மணி அளவில் அவர் புர்கா அணிந்தபடி போலீசார் முன்பு ஆஜரானார். அப்போது அவரை போலீசார் கைது செய்தனர். பின்னர் அவரிடம் விசாரணை நடத்தினர்.

அப்போது போதைப்பொருட்கள் பயன்படுத்தியது குறித்து பல்வேறு கேள்விகளை எழுப்பினர். இதனை தொடர்ந்து நடிகை ஹேமாவை மல்லேசுவரத்தில் உள்ள கே.சி.பொது ஆஸ்பத்திரிக்கு அழைத்து சென்று மருத்துவ பரிசோதனை செய்தனர். போதை பொருட்கள் பயன்படுத்திய விவகாரத்தில் கைது செய்யப்பட்டுள்ள நடிகை ஹேமாவை ஆனேக்கலில் உள்ள தாலுகா கோர்ட்டில் போலீசார் ஆஜர்படுத்த உள்ளனர். அதனை தொடர்ந்து நடிகையை காவலில் எடுத்து விசாரணை நடத்தவும் முடிவு செய்துள்ளனர்.