விக்னேஷ் சிவன் இயக்கத்தில் அஜித்துக்கு வில்லனாகும் அந்த நடிகர்...!

சென்னை

நேர்கொண்ட பார்வை, வலிமை படங்களுக்கு பிறகு 3வது முறையாக நடிகர் அஜித் குமார், தயாரிப்பாளர் போனி கபூர், இயக்குநர் எச்.வினோத் கூட்டணி மீண்டும் இணைந்துள்ள படம் துணிவு. இப்படம் 2023 பொங்கல் அன்று வெளியாகவுள்ளது.

அதனைத் தொடர்ந்து, லைக்கா புரொடக்சன்ஸ் தயாரிப்பில் இயக்குநர் விக்னேஷ் சிவன் இயக்கத்தில் அஜித்குமார் நடிக்க உள்ளார். இதற்கான பணிகள் நடைபெற்று வருகின்றன.

இந்நிலையில் இந்தத் திரைப்படத்தில் நடிகர் அஜித்குமாருக்கு வில்லனாக நடிகர் அரவிந்த்சாமி நடிக்க ஒப்பந்தமாகியுள்ளதாக தகவல் வெளியாகியுள்ளது. அதேபோல் நகைச்சுவை கதாபாத்திரத்திற்கு நடிகர் சந்தானத்தை நடிக்க வைப்பதற்கான முயற்சிகளும் நடந்து வருவதாகத் தெரிவிக்கப்பட்டுள்ளது. இதற்கான அறிவிப்பு விரைவில் வெளியாகும் என எதிர்பார்க்கப்படுகிறது.

தமிழ் சினிமாவில் ஒரு காலத்தில் சாக்லேட் பாயாக வலம் வந்த அரவிந்த்சாமி நீண்ட இடைவேளைக்கு பிறகு தனி ஒருவன் என்ற திரைப்படத்தின் மூலம் வில்லனாக என்ட்ரி கொடுத்தார். அந்தத் திரைப்படத்தின் வெற்றியை தொடர்ந்து தற்போது இவர் பல தமிழ் படங்களில் நடித்து வருகிறார்.

சுரேஷ் மேனன் இயக்கத்தில் அரவிந்த்சாமி, ரேவதி, ரகுவரன் ஆகியோர் நடித்த திரைப்படம் பாசமலர்கள். இந்த திரைப்படத்தில் தற்போது தமிழ் சினிமாவின் முன்னணி நடிகராக வலம் வரும் நடிகர் அஜித்குமார் ஒரு சிறிய கதாபாத்திரத்தில் நடித்து இருந்தார்.