மாமல்லபுரத்தில் இந்திய நாட்டிய விழா இன்று தொடங்குகிறது

மாமல்லபுரம்,

மாமல்லபுரத்தில் சுற்றுலாத்துறை சார்பில் இந்திய நாட்டிய விழா இன்று தொடங்குகிறது. இந்த விழா ஒரு மாதம் தொடர்ந்து நடக்கிறது.

நாட்டிய விழா

சென்னையை அடுத்த மாமல்லபுரத்தில் ஆண்டுதோறும் சுற்றுலாத்துறை சார்பில் வெளிநாட்டு மற்றும் உள்நாட்டு பயணிகளை கவரும் வகையில் ஒரு மாதம் நாட்டிய விழா நடைபெறுவது வழக் கம். இதன்படி இந்த ஆண்டு நாட்டிய விழா இன்று (வெள்ளிக்கிழமை) தொடங்கி தொடர்ந்து ஒரு மாதம் நடைபெறுகிறது.

இதனையடுத்து மாமல்லபுரம் கடற்கரை சாலையில் உள்ள நுழைவு வாயில் அருகில் உள்ள திறந்தவெளி மேடையில் இன்று மாலை தொடக்க விழா நடைபெறுகிறது.

விழாவிற்கு காஞ்சீபுரம் மாவட்ட கலெக்டர் கஜலட்சுமி தலைமை தாங்குகிறார். திருப்போரூர் எம்.எல்.ஏ. எம்.கோதண்டபாணி முன்னிலை வகிக்கிறார். சுற்றுலாத்துறை ஆணையர் ஹர்சகாய்மீனா குத்துவிளக்கேற்றி நாட்டிய விழாவை தொடங்கி வைத்து பேசுகிறார்.

கலைநிகழ்ச்சிகள்

விழாவையொட்டி தினமும் பல்வேறு மாநிலங்களைச் சேர்ந்த கலைஞர்களின் பரதநாட்டியம், ஒடிசி, கதகளி, குச்சுபுடி, மோகினியாட்டம், பொய்க்கால் குதிரை, கரகாட்டம், காவடியாட்டம் உள்ளிட்ட பல்வேறு கலைநிகழ்ச்சிகள் நடக்கிறது.

இதற்கான ஏற்பாடுகள் தீவிரமாக நடந்து வருகிறது.