பெரியகுளத்தில் நகைக்கடை ஊழியர் வீட்டின் பூட்டை உடைத்து திருட்டு

பெரியகுளம்,

பெரியகுளத்தில் நகைக்கடை ஊழியர் வீட்டின் பூட்டை உடைத்து நகை– பணத்தை மர்ம நபர்கள் திருடி சென்றனர்.

தேனி மாவட்டம், பெரியகுளம், தென்கரை, தெற்குரத வீதியை சேர்ந்தவர் புருஷோத்தமன். இவர் நகைகடையில் ஊழியராக வேலை பார்த்து வருகிறார். இவர் கடந்த 2 நாட்களுக்கு முன்பு, தனது மனைவியுடன் வீட்டை பூட்டி விட்டு மதுரையில் உள்ள உறவினர் வீட்டிற்கு சென்று விட்டார்.

இந்நிலையில் நேற்று காலையில் அவருடைய வீட்டு கதவின் பூட்டு உடைக்கப்பட்டு கிடப்பதை பார்த்த உறவினர் செந்தில்குமார் புருஷோத்தமனுக்கு தகவல் தெரிவித்தார். உடனே அவர் வீட்டிற்கு விரைந்து வந்து பார்த்தார். அப்போது வீட்டில் இருந்த பீரோ உடைக்கப்பட்டு இருந்தது. அதில் இருந்த ரூ.76 ஆயிரம் மற்றும் 7 பவுன் தங்க நகைகளை மர்ம நபர்கள் திருடி சென்று இருப்பது தெரியவந்தது.

இது குறித்து தென்கரை போலீஸ் நிலையத்தில் புகார் தெரிவிக்கப்பட்டது. அதன்பேரில் போலீசார் சம்பவ இடத்திற்கு விரைந்து சென்று விசாரணை நடத்தினர். சம்பவம் நடந்த வீட்டிற்கு தேனியில் இருந்து கைரேகை நிபுணர் வசந்தி வரவழைக்கப்பட்டு அங்கு பதிவாகியிருந்த தடயங்களை சேகரித்தார்.

அதே போன்று மோப்ப நாய் லக்கி வரவழைக்கப்பட்டு சோதனை நடத்தப்பட்டது. அது திருட்டு நடந்த வீட்டில் இருந்து சிறிது தூரம் மெயின்ரோட்டில் ஓடி சென்று நின்றது. இச்சம்பவம் குறித்து தென்கரை போலீசார் வழக்குப்பதிவு செய்து மர்ம நபர்களை வலைவீசி தேடி வருகின்றனர்.