குற்றாலம் வனப்பகுதியில் சுற்றி திரிந்த 3 பேர் கைது துப்பாக்கி, பயங்கர ஆயுதங்கள் பறிமுதல்

செங்கோட்டை,

குற்றாலம் வனப்பகுதியில் சுற்றி திரிந்த 3 பேர் கைது செய்யப்பட்டனர். அவர்களிடம் இருந்து துப்பாக்கி மற்றும் பயங்கர ஆயுதங்கள் பறிமுதல் செய்யப்பட்டன.

நெல்லை மாவட்டம் செங்கோட்டை அருகே குற்றாலம் வனச்சரகத்துக்கு உட்பட்ட கண்ணுபுளிமெட்டு அருகே உள்ள பனிமுண்டம் வனப்பகுதியில் பயங்கர ஆயுதங்களுடன் மர்ம கும்பல் சுற்றி திரிவதாக குற்றாலம் வனச்சரகர் செந்தில்குமாருக்கு தகவல் கிடைத்தது. அதன்பேரில் வனச்சரகர்கள் செந்தில்குமார், வெள்ளத்துரை ஆகியோர் தலைமையில் வனவர்கள் அந்த பகுதியில் ரோந்து சென்றனர்.

அப்போது அங்கு வனப்பகுதிக்குள் சந்தேகப்படும்படியாக 6 பேர் கும்பல் சுற்றி திரிந்தது. அவர்கள் துப்பாக்கி மற்றும் பயங்கர ஆயுதங்களை கையில் வைத்திருந்தனர். வனத்துறையினர் வருவதை கண்டதும் அந்த கும்பல் தப்பி ஓடியது. அவர்களை வனத்துறையினர் துரத்திச் சென்றனர். இதில் 3 பேரை வனத்துறையினர் மடக்கி பிடித்தனர். மேலும் 3 பேர் தப்பி ஓடிவிட்டனர்.

பிடிபட்ட 3 பேரிடம் வனத்துறையினர் தீவிர விசாரணை நடத்தினர். விசாரணையில் தென்காசி வல்லம் பகுதியை சேர்ந்த ராஜூ (வயது 32), சுப்பிரமணியன், கோமு (35) ஆகியோர் என்பது தெரிய வந்தது. அவர்கள் வனவிலங்குகளை கும்பலாக சென்று வேட்டையாடுவதும் தெரிய வந்தது. உடனே வனத்துறையினர் அவர்கள் 3 பேரையும் கைது செய்தனர்

அவர்களிடம் இருந்து நாட்டு துப்பாக்கி மற்றும் கத்தி, அரிவாள் உள்ளிட்ட பயங்கர ஆயுதங்களையும் பறிமுதல் செய்தனர். மேலும் தப்பி ஓடிய 3 பேரையும் வனத்துறையினர் தேடி வருகின்றனர்.