பெரம்பலூர் அருகே அடையாளம் தெரியாத வாகனம் மோதி அய்யப்ப பக்தர் பலி

பெரம்பலூர் அருகே அடையாளம் தெரியாத வாகனம் மோதிய விபத்தில் அய்யப்ப பக்தர் பரிதாபமாக இறந்தார்.

அய்யப்ப பக்தர் பலி

தெலுங்கானா மாநிலம் வாராங்கல் பகுதியை சேர்ந்தவர் கிருஷ்ணய்யா (வயது 45). இவர், சென்னை வேப்பேரி பகுதியில் உள்ள ஒரு அடுக்குமாடி குடியிருப்பில் காவலாளியாக வேலை செய்து வந்தார். மேலும் அய்யப்ப பக்தரான இவர், சபரிமலைக்கு மாலை அணிந்து விரதம் இருந்தார். இந்த நிலையில் சபரிமலை செல்வதற்காக கிருஷ்ணய்யா மற்றும் அவரது நண்பர்கள் உள்பட 19 பேர் மினிவேன் மூலம் சென்னையிலிருந்து புறப்பட்டு வந்தனர். பெரம்பலூர் அருகேயுள்ள செங்குணம் பிரிவு ரோடு பகுதியில் நேற்று அதிகாலை வந்த போது மினிவேனை நிறுத்திவிட்டு அய்யப்ப பக்தர்கள் டீக்குடிக்க சென்றனர்.
அப்போது அங்கு கிருஷ்ணய்யா சாலையை கடந்து செல்ல முயன்ற போது அடையாளம் தெரியாத வாகனம் ஒன்று அவர் மீது மோதிவிட்டு நிற்காமல் சென்றது. இந்த விபத்தில் தூக்கி வீசப்பட்ட கிருஷ்ணய்யா பலத்த காயத்துடன் சம்பவ இடத்திலேயே பரிதாபமாக இறந்தார்.

சோகம்

இது குறித்து தகவல் அறிந்ததும் சம்பவ இடத்திற்கு பெரம்பலூர் போலீஸ் சப்-இன்ஸ்பெக்டர் பெரியசாமி மற்றும் போலீசார் விரைந்து வந்தனர். பின்னர் அவர்கள் கிருஷ்ணய்யாவின் உடலை கைப்பற்றி பிரேத பரிசோதனைக்காக பெரம்பலூர் அரசு ஆஸ்பத்திரிக்கு அனுப்பி வைத்தனர். கோவிலுக்கு செல்லும் வழியில் உடன் வந்த சக அய்யப்ப பக்தர் ஒருவர் இறந்து விட்டதை எண்ணி மற்ற பக்தர்கள் சோகத்துடன் அரசு ஆஸ்பத்திரியில் நின்று கொண்டிருந்தனர். இந்த சம்பவம் குறித்து போலீசார் வழக்குப்பதிவு செய்து கிருஷ்ணய்யாவின் மீது மோதிவிட்டு நிற்காமல் சென்ற வாகனத்தின் டிரைவரை தேடி வருகின்றனர்.