புதுச்சேரியில் போகி பண்டிகை கொண்டாட்டம்

போகி பண்டிகை

தமிழர் திருநாளாம் பொங்கல் பண்டிகைக்கு முதல் நாள் கொண்டாடப்படுவது போகி பண்டிகை ஆகும். பழையன கழிதலும், புதியன புகுதலும் என்பதற்கேற்ப போகி பண்டிகை நேற்று கொண்டாடப்பட்டது.

போகி பண்டிகையையொட்டி வீட்டில் இருக்கும் பழைய பொருட்களை தீயிட்டு கொளுத்துவார்கள். நேற்று முன்தினம் நள்ளிரவு முதலே போகி பண்டிகையை புதுச்சேரியில் கொண்டாட ஆரம்பித்து விட்டனர்.

நேற்று அதிகாலையிலும் போகி பண்டிகையையொட்டி வீட்டில் இருக்கும் பழைய பொருட்களை எடுத்து எரிக்க தொடங்கினர். இதனால் புதுச்சேரி மற்றும் அதனை ஒட்டியுள்ள பகுதிகளில் நேற்று அதிகாலையில் இருந்தே புகை மூட்டம் சூழத்தொடங்கியது.

புகை மூட்டம்

தற்போது பனி மூட்டமும் காலையில் இருப்பதால், புகை மூட்டமும் அதனுடன் சேர்ந்து ‘கும்’ இருட்டுடன் புதுச்சேரி மற்றும் அதனை ஒட்டியுள்ள புறநகர் பகுதிகள் காட்சி அளித்தன.

இதனால் காலையில் அலுவலக பணி மற்றும் இதர பணிகளுக்காக வாகனங்களில் சென்ற வாகன ஓட்டிகள் விளக்குகளை எரிய விட்டபடியே சென்றனர். சிலருக்கு புகை கண் எரிச்சல் மற்றும் இருமலை ஏற்படுத்தியது. இதனால் அவர்கள் கடும் அவதிக்கு உள்ளானார்கள்.

விடிந்ததும் அனைத்து வீதிகளிலும் பொதுமக்கள் எரித்த குப்பைகள் குவிந்து கிடந்தன. அதை துப்புரவு ஊழியர்கள் அகற்றும் பணியில் ஈடுபட்டனர்.