பாண்டெக்ஸ் சாயப்பிரிவு ஊழியர்கள் போராட்டம்

புதுச்சேரி,

புதுச்சேரி தட்டாஞ்சாவடியில் பாண்டெக்ஸ் கூட்டுறவு கைத்தறி சங்கம் இயங்கி வருகிறது. இதையொட்டி பாண்டெக்ஸ் சாயப்பிரிவு பட்டறை உள்ளது. இங்கு நூலில் சாயம் போடும் பணியில் பெண்கள் உள்பட 46 ஊழியர்கள் பணியாற்றி வருகின்றனர். இவர்களுக்கு கடந்த 3 மாதமாக சம்பளம் வழங்கப்படவில்லை.

இதுகுறித்து பலமுறை கோரிக்கை விடுத்தும் பலன் இல்லாததால் பாதிக்கப்பட்ட ஊழியர்கள் நேற்று பாண்டெக்ஸ் அலுவலகம் முன்பு ஒட்டுமொத்தமாக திரண்டனர். பாண்டெக்ஸ் கைத்தறி சங்கம்-சாயப்பிரிவு பட்டறைக்கு இடையே உள்ள மதில் சுவரை இடித்து தள்ளி விட்டு 2 அலுவலகத்தையும் இணைக்க முயன்றனர்.

பின்னர் கோரிக்கைகளை வலியுறுத்தி பாண்டெக்ஸ் அலுவலகத்தில் உள்ளிருப்பு போராட்டம் தொடங்கினர். இதனால் ஏற்பட்ட பரபரப்பை தொடர்ந்து கோரிமேடு போலீசார் அங்கு சென்று போராட்டத்தில் ஈடுபட்டவர் களிடம் சமாதான பேச்சுவார்த்தை நடத்தினர். ஆனால் இதில் உடன்பாடு ஏற்படவில்லை. பின்னர் நேற்று மாலையில் அவர்கள் போராட்டத்தினை கைவிட்டனர்.

நாளை (திங்கட்கிழமை) மீண்டும் போராட்டம் நடத்த அவர்கள் திட்டமிட்டுள்ளனர்.