இயற்கை எரிவாயு எடுக்க எதிர்ப்பு: நெடுவாசலில் குவிந்த கல்லூரி மாணவ- மாணவிகள்

புதுக்கோட்டை,

நெடுவாசல் போராட்டம்

புதுக்கோட்டை மாவட்டம் ஆலங்குடி தாலுகா வடகாடு அருகே உள்ள நெடுவாசல் கிராமத்தில் ஹைட்ரோ கார்பன் எனும் இயற்கை எரிவாயு எடுக்கும் திட்டத்திற்கு எதிராக மக்கள் போராட்டம் நடத்தி வருகிறார்கள். நெடுவாசல் நாடிமுத்து மாரியம்மன் கோவில் குளக்கரை அருகில் உள்ள ஆல மரத்தடியில் பொதுமக்கள் கடந்த 16-ந் தேதி அறவழி போராட்டத்தை தொடங்கினார்கள். இதில் நெடுவாசல் மற்றும் சுற்று வட்டார கிராமங்களை சேர்ந்த விவசாயிகள், தொழிலாளர்கள், பெண்கள், மாணவ- மாணவிகள், இளைஞர்கள், பல்வேறு இடங்களில் பணிபுரியும் தனியார் நிறுவன ஊழியர்கள் என திரண்டு வந்து கலந்து கொண்டனர். ஹைட்ரோ கார்பன் திட்டத்தின் ஆபத்தை பற்றி ஊடகங்களிலும், சமூக வலைத்தளங்களிலும் செய்திகள் வேகமாக பரவி வருவதால் போராட்ட களத்தில் ஈடுபட்டுள்ளவர்களின் எண்ணிக்கையும் நாளுக்கு நாள் அதிகரித்து வருகிறது.நேற்று 13-வது நாளாக தர்ணா போராட்டம் தொடர்ந்தது. நேற்றைய போராட்டத்தில் நெடுவாசல் மற்றும் சுற்று வட்டார கிராமங்களை சேர்ந்தவர்கள் மட்டும் இன்றி வெளியூர்களில் இருந்தும் ஏராளமான பள்ளி மற்றும் கல்லூரி மாணவ- மாணவிகள், இளைஞர்கள் கலந்து கொண்டனர். பெண்கள் கைக்குழந்தைகளுடன் பங்கேற்றனர்.

உணவு வினியோகம்

போராட்டத்தில் ஈடுபட்டு உள்ளவர்களுக்கு அவ்வப்போது டீ, பிஸ்கட் வழங்கப்பட்டது. மதிய உணவும் வழங்கப்பட்டது. போராட்ட களத்தில் உள்ள மாணவர்கள் இதனை எல்லோருக்கும் அவர்களது இருப்பிடத்திற்கே எடுத்து சென்று வினியோகம் செய்தனர்.இந்த திட்டம் இந்த பகுதியில் செயல்படுத்தப்படாது, ரத்து செய்யப்படும் என மத்திய அரசு உறுதியாக அறிவிக்கும் வரை எங்கள் போராட்டம் தொடரும்” என போராட்டத்தில் கலந்து கொண்டவர்கள் ஆவேசமாக கூறினார்கள்.நேற்றைய போராட்டத்தில் திரைப்பட இயக்குனர் கவுதமன், தமிழ் மாநில காங்கிரஸ் கட்சியின் இளைஞர் அணி தலைவர் யுவராஜா உள்ளிட்ட முக்கிய பிரமுகர்கள் கலந்து கொண்டு ஆதரவு தெரிவித்தனர்.