தாரமங்கலம் அருகே, தேர்வு எழுத சென்ற பிளஸ்–2 மாணவி கடத்தல்; வாலிபர் கைது

தாரமங்கலம்,

தாரமங்கலம் பகுதியைச் சேர்ந்த 17 வயதுடைய இளம் பெண், ஓமலூரில் உள்ள தனியார் மகளிர் மேல்நிலைப்பள்ளி ஒன்றில் பிளஸ்–2 படித்து வருகிறார். கடந்த 13–ந் தேதி தேர்வு எழுத சென்ற இந்த மாணவி வீட்டுக்கு திரும்பவில்லை. அவரை பல்வேறு இடங்களில் பெற்றோர், உறவினர்கள் தேடியும் கிடைக்கவில்லை.

இதனிடையே மாணவியின் பக்கத்து வீட்டில் வசிக்கும் குமார்(வயது 21) என்பவர் தேர்வு எழுத சென்ற அந்த மாணவியை கடத்தி சென்று விட்டதாக அந்த மாணவியின் பெற்றோர் தாரமங்கலம் போலீசில் புகார் செய்துள்ளனர். அதன்பேரில் மாணவியை கடத்தி சென்றதாக குமார் மீது போலீசார் வழக்குப்பதிவு செய்து அவரையும், கடத்தப்பட்ட மாணவியையும் தேடி வருகின்றனர்.

இந்த நிலையில் நேற்று தாரமங்கலம் பஸ் நிலையத்தில், கடத்தப்பட்ட மாணவியுடன் நின்றிருந்த குமாரை போலீசார் கைது செய்தனர். அந்த மாணவியையும் மீட்டனர். அவரிடம் போலீசார் நடத்திய விசாரணையில், அந்த மாணவியை ஆசை வார்த்தை கூறி கடத்தி சென்று பெங்களூருவில் உள்ள முருகன் கோவில் ஒன்றில் திருமணம் செய்து கொண்டு, அங்கு தங்கி இருந்து விட்டு மீண்டும் ஊருக்கு திரும்பி வந்தது தெரியவந்தது.

இதையடுத்து கைது செய்யப்பட்ட குமார் மற்றும் அந்த மாணவியை சேலம் மகிளா நீதிமன்றத்தில் போலீசார் ஆஜர்படுத்தினர்.