விழுப்புரத்தில் குடிபோதையில் தகராறில் ஈடுபட்ட கூலித்தொழிலாளி கழுத்தை அறுத்து படுகொலை தம்பிக்கு போலீஸ் வலைவீச்சு

விழுப்புரம்,

கூலித்தொழிலாளி

விழுப்புரம் காகுப்பம் இந்திராநகர் மாணிக்கம் லே-அவுட்டை சேர்ந்தவர் லூர்து மகன் சூசைநாதன் (வயது 45), கூலித்தொழிலாளி. இவருக்கு குடிப்பழக்கம் உண்டு. அடிக்கடி இவர் மது குடித்துவிட்டு வீட்டிற்கு வந்து தனது மனைவியிடம் தகராறு செய்து வந்தார்.

இந்த நிலையில் நேற்று முன்தினம் இரவு சூசைநாதன், குடிபோதையில் வீட்டிற்கு வந்து மனைவி மலரிடம் தகராறு செய்து அவரை திட்டியதாக தெரிகிறது. இதனால் மலர் தனது கணவர் சூசைநாதனிடம் கோபித்துக்கொண்டு விழுப்புரம் ரெயில்வே காலனியில் உள்ள பெற்றோர் வீட்டிற்கு சென்று விட்டார்.

கழுத்தை அறுத்துக்கொலை

அதன்பிறகு போதை தலைக்கேறிய நிலையில் சூசைநாதன், அதே பகுதியில் உள்ள தனது தம்பியான தேவராஜ் (38) வீட்டிற்கு சென்று அவரிடம் தகராறு செய்துள்ளார். மேலும் தேவராஜை சூசைநாதன் தகாத வார்த்தையால் திட்டியதாக கூறப்படுகிறது.

இதனால் ஆத்திரமடைந்த தேவராஜ், தனது வீட்டிற்குள் சென்று காய்கறி வெட்டும் கத்தியை எடுத்து வந்து அண்ணன் என்றுகூட பாராமல் சூசைநாதனின் கழுத்தை அறுத்தார். இதில் அதே இடத்திலேயே ரத்த வெள்ளத்தில் துடிதுடித்து சூசைநாதன் இறந்தார். உடனே அங்கிருந்து தேவராஜ் தப்பிச்சென்று விட்டார்.

தம்பிக்கு வலைவீச்சு

இதுபற்றிய தகவல் அறிந்ததும் விழுப்புரம் துணை போலீஸ் சூப்பிரண்டு சங்கர், தாலுகா போலீஸ் இன்ஸ்பெக்டர் ராஜன், சப்-இன்ஸ்பெக்டர்கள் மருதப்பன், சத்தியசீலன், விஜயகுமார் மற்றும் போலீசார் சம்பவ இடத்திற்கு விரைந்து சென்று விசாரணை நடத்தினார்கள். பின்னர், சூசைநாதனின் உடலை கைப்பற்றி பிரேத பரிசோதனைக்காக முண்டியம்பாக்கம் அரசு மருத்துவமனைக்கு அனுப்பி வைத்தனர்.

இதுகுறித்த புகாரின்பேரில் விழுப்புரம் தாலுகா போலீசார் வழக்குப்பதிவு செய்து தப்பி ஓடிய தேவராஜை வலைவீசி தேடி வருகின்றனர். கொலை செய்யப்பட்ட சூசைநாதனுக்கு 3 மகன்களும், ஒரு மகளும் உள்ளனர்.

குடிபோதையில் நடந்த தகராறில் அண்ணனை தம்பியே கழுத்தை அறுத்து படுகொலை செய்த சம்பவம் அப்பகுதியில் பெரும் பரபரப்பை ஏற்படுத்தியுள்ளது.