லால்குடி அருகே கயிற்றால் கழுத்தை இறுக்கி பெண் கொலை; கணவர் கைது

லால்குடி,

லால்குடியை அடுத்த அன்பில் குறிச்சி பகுதியை சேர்ந்தவர் ரெங்கராஜ் என்ற வடிவேல் (வயது 37). விவசாய கூலி தொழிலாளியான இவர் மது குடிக்கும் பழக்கம் உடையவர். இவருடைய மனைவி அஞ்சலை(30). இவர்களுக்கு ஒரு மகன் மற்றும் ஒரு மகள் உள்ளனர். வடிவேலின் குடிப்பழக்கத்தால் கணவன்- மனைவி இடையே அடிக்கடி தகராறு ஏற்பட்டு வந்தது.

இந்நிலையில் நேற்று முன்தினம் இரவும் இருவருக்கும் இடையே தகராறு ஏற்பட்டு நீண்ட நேரம் சண்டை நடந்துள்ளது. அக்கம், பக்கத்தினர் அவர்களை சமாதானப்படுத்தினர். பின்னர் நள்ளிரவில் வடிவேல் வீட்டின் கதவு திறந்து கிடந்ததை கண்டு சந்தேகப்பட்டு அக்கம், பக்கத்தினர் அங்கு சென்று பார்த்தபோது அஞ்சலை கழுத்தில் கயிறு இறுக்கப்பட்ட நிலையில் பிணமாக கிடந்ததை கண்டு அதிர்ச்சியடைந் தனர்.

கணவர் கைது

இது குறித்த தகவலின் பேரில் லால்குடி போலீஸ் துணை சூப்பிரண்டு நடராஜன், இன்ஸ்பெக்டர் தினேஷ்குமார் மற்றும் போலீசார் சம்பவ இடத்திற்கு சென்று அஞ்சலையின் உடலை கைப்பற்றி லால்குடி அரசு மருத்துவ மனைக்கு பிரேத பரிசோதனைக்காக அனுப்பி வைத்தனர். இதையடுத்து வடிவேலை பிடித்து விசாரணை நடத்தியதில், அவர் குடிபோதையில் மனைவியின் கழுத்தை கயிற்றால் இறுக்கி கொலை செய்தது தெரியவந்தது. இது குறித்து போலீசார் வழக்குப்பதிவு செய்து வடிவேலை கைது செய்தனர்.