திருவள்ளூரில் கொடுத்த பணத்தை திருப்பி கேட்டவரை தாக்கியவர் கைது

திருவள்ளூர்,

திருவள்ளூர் ஜே.என்.சாலையை சேர்ந்தவர் ஹென்றி (வயது 68). இவரிடம் அதே பகுதியை சேர்ந்த ரமேஷ் (47) என்பவர் கடந்த சில மாதங்களுக்கு முன்னர் பணம் வாங்கியிருந்தார். அந்த பணத்தை வாங்கி வருமாறு ஹென்றி தனது மகன் கிங்ஸ்லீ ஜீவானந்தத்திடம் சொல்லி அனுப்பினார். அவர் நேற்று முன்தினம் ரமேஷிடம் தங்களுக்கு தர வேண்டிய பணத்தை திருப்பி தருமாறு கேட்டார். அதற்கு பணத்தை தர மறுப்பு தெரிவித்த ரமேஷ், கிங்ஸ்லீ ஜீவானந்தத்தை தகாத வார்த்தைகளால் பேசி தாக்கி உள்ளார். இதில் காயம் அடைந்த அவர் திருவள்ளூர் அரசு ஆஸ்பத்திரியில் அனுமதிக்கப்பட்டார்.

இது குறித்து கிங்ஸ்லீ ஜீவானந்தம் திருவள்ளூர் டவுன் போலீசில் புகார் செய்தார். போலீசார் வழக்குப்பதிவு செய்து ரமேஷை கைது செய்து விசாரித்து வருகிறார்கள்.