நகைச்சுவை நடிகர் சாது கோகிலாவின் காரில் இருந்து வெளிநாட்டு பணம்-மடிக்கணினி திருடிய டிரைவர் கைது

பெங்களூரு,

நகைச்சுவை நடிகர் காரில் இருந்து வெளிநாட்டு பணம்-மடிக்கணினி ஆகியவற்றை திருடிய டிரைவரை போலீசார் கைது செய்தனர். சொகுசு வாழ்க்கை வாழ ஆசைப்பட்டு கைவரிசை காட்டியது தெரியவந்தது.

திருட்டு

கன்னட திரையுலகில் நகைச்சுவை நடிகராக இருந்து வருபவர் சாது கோகிலா. இவரிடம் பெங்களூரு ஸ்ரீநகரில் வசித்து வரும் விஜயகுமார் என்ற காஜா (வயது 29) என்பவர் கார் டிரைவராக பணியாற்றி வந்தார். இந்த நிலையில் சாது கோகிலா கடந்த மாதம் 24-ந் தேதி தனது சகோதரி வீட்டுக்கு காரில் சென்றார். காரை விஜயக்குமார் ஓட்டி சென்றார்.

சகோதரியின் வீட்டுக்குள் சாது கோகிலா சென்றார். இந்த வேளையில், வீட்டுக்கு வெளியே நின்ற விஜயகுமார் அவருடைய காரில் இருந்த மடிக்கணினி, வெளிநாட்டு பணம் (அமெரிக்க டாலர்) ஆகியவற்றை திருடி சென்றுவிட்டார். இதுகுறித்து, அறிந்து அதிர்ச்சி அடைந்த சாது கோகிலா சந்திரா லே-அவுட் போலீசில் புகார் செய்தார். இதற்கிடையே விஜயகுமார் தலைமறைவானார். இதுகுறித்து போலீசார் வழக்குப்பதிவு செய்து டிரைவர் விஜயகுமாரை தீவிரமாக தேடி வந்தனர்.

கைது

இந்த நிலையில், விஜய குமார் கோவாவில் பதுங்கி இருப்பதாக போலீசாருக்கு ரகசிய தகவல் கிடைத்தது. இந்த தகவலின் அடிப்படையில் கோவாவுக்கு சென்ற போலீசார் விஜயகுமாரை கைது செய்தனர். இவரிடம் இருந்து ரூ.23 ஆயிரத்து 500 மற்றும் அமெரிக்க டாலர் ஆகியவற்றை பறிமுதல் செய்தனர். விசாரணையில், சொகுசு வாழ்க்கை வாழ ஆசைப்பட்டு அவர் மடிக்கணினி மற்றும் அமெரிக்க டாலரை திருடியது தெரியவந்தது. மேலும், அவரிடம் விசாரணை நடைபெற்று வருகிறது.