சென்னை விமான நிலையத்தில் கிடந்த மர்ம சூட்கேசால் பரபரப்பு

ஆலந்தூர்

சென்னை மீனம்பாக்கம் விமான நிலைய உள்நாட்டு முனையம் புறப்பாடு பகுதியின் அருகே நீண்ட நேரமாக ஒரு சூட்கேஸ் கிடந்தது. இதில், வெடிகுண்டு ஏதேனும் இருக்குமோ? என மத்திய தொழிற்படை போலீசார் மற்றும் விமான நிலைய போலீசார் சந்தேகப்பட்டனர். இதனால் உடனே வெடிகுண்டு நிபுணர்களுக்கு தகவல் தெரிவிக்கப்பட்டது. இதையடுத்து, வெடிகுண்டு நிபுணர்கள் மோப்ப நாயுடன் விரைந்து சென்று அங்கு தடுப்பு ஏற்படுத்தி அந்த மர்ம சூட்கேசை சோதனை செய்தனர்.

அப்போது, அதில் வெடிகுண்டு ஏதுமில்லை என்பது தெரியவந்தது. பின்னர் சூட்கேசை திறந்து பார்த்தபோது அதில் துணிகள் இருந்தன. விமானத்தில் ஏற வந்த பயணி யாராவது அதை விட்டு சென்று இருக்கலாம் என தெரிகிறது. இதைத்தொடர்ந்து அந்த சூட்கேஸ் விமான நிலைய மேலாளரிடம் ஒப்படைக்கப்பட்டது. இதனால் விமான நிலையத்தில் சிறிது நேரம் பரபரப்பு ஏற்பட்டது.