கள்ளத்துப்பாக்கிகள் வைத்திருந்த 3 பேர் கைது ஜெலட்டின் குச்சிகள், சாராயம் பறிமுதல்

கொடைக்கானல்,

திண்டுக்கல் மாவட்டம் கொடைக்கானல் அருகே உள்ள வடகவுஞ்சி கிராமத்தில் கள்ளத்துப்பாக்கியுடன் சிலர் நடமாடுவதாகவும், சாராயம் காய்ச்சுவதாகவும் போலீசாருக்கு ரகசிய தகவல் கிடைத்தது. இதை யடுத்து போலீஸ் துணை சூப்பிரண்டு செல்வம் உத்தரவின்பேரில், போலீஸ் இன்ஸ்பெக்டர் முருகானந்தம், சப்-இன்ஸ்பெக்டர் ரமேஷ் ராஜா மற்றும் போலீசார் வடகவுஞ்சி கிராமத்துக்கு விரைந்து சென்றனர். அங்கு கொடியன்காடு என்னுமிடத்தில் கணேசன் தோட்டத்தில் அதிரடியாக சோதனை நடத்தினர். போலீசாரை பார்த்ததும் தோட்டத்தில் இருந்த 4 பேர் தப்பியோடினர். அதில் 2 பேரை போலீசார் பிடித்தனர். விசாரணையில் அவர்கள்,
ஒட்டன்சத்திரம் தாசில்தார்பட்டியை அடுத்த டி.புதுக்கோட்டையை சேர்ந்த கணேசன் (வயது 38), தங்கராஜ் (57) என்றும், அந்த தோட்டத்தை குத்தகைக்கு எடுத்து விவசாயம் செய்து வருவதும் தெரியவந்தது.

3 பேர் கைது

இதைத்தொடர்ந்து தோட்டத்தில் அவர்கள் வசித்து வந்த வீட்டில் போலீசார் சோதனை நடத்தினர். அங்கு 2 நாட்டுத்துப்பாக்கிகள் இருந்தன. அதில் ஒன்று உடைந்த நிலையில் இருந்தது. அவற்றை போலீசார் கைப்பற்றினர். அந்த துப்பாக்கிகள் உரிமம் பெறாமல் கள்ளத்துப்பாக்கிகளாக இருக்கலாம் என்று போலீசார் சந்தேகிக்கின்றனர். மேலும் வெடிக்காத 5 தோட்டாக்கள், வெடித்த நிலையில் 15 தோட்டாக்கள், தோட்டாக்களில் வைக்கும் கரிமருந்து, 7 ஜெலட்டின் குச்சிகள், 5 லிட்டர் சாராயம் ஆகியவற்றையும் பறிமுதல் செய்தனர்.

மேலும் அவர்களுக்கு உதவியாக இருந்த அதே பகுதியில் மற்றொரு தோட்டத்தில் வசிக்கும் மலைச்சாமி (24) என்பவரையும் பிடித்தனர். இதுகுறித்து கொடைக்கானல் போலீசார் வழக்குப்பதிவு செய்து கணேசன், தங்கராஜ், மலைச்சாமி ஆகிய 3 பேரை கைது செய்தனர். அவர்கள் கள்ளத்துப்பாக்கிகள் வைத்திருந்ததால் வனவிலங்குகளை வேட்டையாடினரா? என்பது குறித்தும் போலீசார் விசாரணை நடத்தி வருகின்றனர்.

சோதனையின்போது, போலீசாரை பார்த்ததும் தப்பியோடி தலைமறைவான ராமகிருஷ்ணன், அய்யப்பன் ஆகிய 2 பேரை வலைவீசி தேடி வருகின்றனர்.