பெரியகுளத்தில், ஆட்டோ-தனியார் பள்ளி பஸ் மோதல்: தாய்-மகள் உள்பட 4 பேர் பலி

பெரியகுளம்,

தேனி மாவட்டம் பெரியகுளம் தென்கரையை சேர்ந்தவர் செந்தில்குமார். வக்கீல். இவருடைய மனைவி கார்த்திகா (வயது 36). இவர் நேற்று மாலையில் ஒரு ஆட்டோவில் தேனிக்கு புறப்பட்டார். அப்போது தனது மகள் சகாந்தினி (12), மகன் சசிதர் (7) மற்றும் உறவினர்கள் கயல்விழி (45), இவருடைய மகன் கலையரசன் (15), மகள் மிருளானி (12) ஆகியோரையும் உடன் அழைத்து சென்றார். ஆட்டோவை வசந்த் (18) என்பவர் ஓட்டினார்.

பெரியகுளம்-தேனி சாலையில் ஆட்டோ சென்று கொண்டிருந்தது. அப்போது தனியார் பள்ளி பஸ் ஒன்று மாணவ, மாணவிகளை ஏற்றிக்கொண்டு வந்தது. இந்த பஸ்சும், ஆட்டோவும் கண் இமைக்கும் நேரத்தில் நேருக்கு, நேர் மோதிக்கொண்டன.
இதில் ஆட்டோவில் வந்த கலையரசன் சம்பவ இடத்திலேயே பரிதாபமாக இறந்தார். மற்ற 6 பேரும் படுகாயம் அடைந்தனர். உடனே அவர்களை அக்கம் பக்கத்தினர் மீட்டு தேனி அரசு மருத்துவக்கல்லூரி மருத்துவமனைக்கு சிகிச்சைக்காக அனுப்பி வைத்தனர். இதில் மருத்துவமனையில் சிகிச்சை பலன் அளிக்காமல் கார்த்திகா, சகாந்தினி, கயல்விழி ஆகிய 3 பேரும் பரிதாபமாக இறந்தனர். சசிதரை மேல்சிகிச்சைக்காக மதுரையில் உள்ள தனியார் ஆஸ்பத்திரிக்கு அனுப்பி வைத்தனர்.

இந்த விபத்து குறித்து தென்கரை போலீசார் வழக்குப்பதிவு செய்து விசாரணை நடத்தி வருகிறார்கள். பெரியகுளத்தில் தாய்-மகள் உள்பட 4 பேர் விபத்தில் இறந்த சம்பவம் பெரும் சோகத்தை ஏற்படுத்தி உள்ளது.